Уһук Илин эрэгийиэҥҥэ 2024 сылга диэри 95 миллиард солкуобай суумаҕа 48 авиапорт саҥардыллара күүтүллэр.
Бүгүн, муус устар 12 күнүгэр, Арасыыйаҕа Авиация уонна космонавтика күнэ бэлиэтэнэр. Дойду бэрэсидьиэнэ Владимир Путин салгынынан сырыы тырааныспарын,дьоҕус авиацияны уонна Уһук Илин авиапуортарын саҥардыы үлэтин ыытар соруктары туруорбута. Бэрэсидьиэн этиитинэн «Тырааныспар систиэмэтин сайдыыта» диэн судаарыстыбаннай бырагыраамаҕа Уһук Илин авиапуортарын саҥардыы үлэтэ киирбитэ.
Бу федеральнай бырайыакка Саха сирин ыраах сытар авиапуортара эмиэ киирдилэр. Ол курдук, 2023 сылга диэри 38,6 миллиард солкуобай суумаҕа 16 авиапуорт саҥардыллыаҕа. Өлүөхүмэ, Нерюнгри, Эдьигээн уонна Дьокуускай авиапуортарын көтөр балаһаларын өрөмүөнэ былырыыҥҥыттан саҕаламмыта. Дьокуускай авиапуордун саҥардыы үлэтин иккис уочаратын үс эбийиэгэ саҥардыллан бүтэн, салгыы бу үлэҕэ 4,2 миллиард солкуобай көрүллүөҕэ диэн Уһук Илин уонна Арктиканы сайыннарыы миниистирэ Александр Козлов биллэрбитэ.
Быйыл Үөһээ Бүлүү аэропуортун саҥардыы уонна Мииринэй, Маҥан, Уус-Ньара, Полярнай авиапуортарын өрөмүөннээһин үлэтин бырайыактара оҥоһуллан бүтүөхтэрэ. Өрөспүүбүлүкэ бырабыталыстыбата ыраах сытар өссө уон авиапуорду федеральнай бырагыраамаҕа киллэрэн, тупсарар былааннаах.
Бэрэсидьиэн Уһук Илин федеральнай уокурукка Боломуочуйалаах бэрэстэбиитэлэ Юрий Трутнев сорудаҕынан авиапуордары саҥардыы үлэтин онлайн-сервис нөҥүө Росавиация хонтуруоллуоҕа.
Нюргуяна Иванова, “Саха сирэ” хаһыат, edersaas.ru
Хаартыска — интэриниэттэн.