Бэс ыйын 16 күнүгэр СӨ Тырааныспарын уонна суол хаһаайыстыбатын миниистирэ Владимир Сивцев быһа эпииргэ тахсан, ыйытыыларга хоруйдаата.
еdersaas.ru
Үгүс ыйытыы бэйэни хааччахтаныы кэмигэр хаалбыт билиэттэри төннөрүү туһунан буолла. Владимир Сивцев федеральнай хампаанньалар (“Аэропорт”, S7 авиахампаанньалар, о.д.а.) билиэти төннөрбөттөрүн туһунан тоһоҕолоон бэлиэтээтэ.
Оттон өрөспүүбүлүкэ иһинээҕи “Якутия”, “Полярные линии”, “АЛРОСА” хампаанньалар билиэттэри төннөрөргө кулун тутар 17 күнүттэн муус устар 30 күнүгэр диэри сайабылыанньалары туппуттара. Холобур, “Якутия” авихампаанньаҕа 10 тыһыынча кэриҥэ сайабылыанньа киирбититтэн, 5,5 тыһыынча киһиэхэ 250 мөлүйүөн солкуобай суумалаах билиэттэрин харчытын номнуо төннөрбүттэр.
Сорох дьон “Якутия” хампаанньаҕа кыайан төлөпүөннээн тиийбэппит диэн үҥүстүлэр. Онуоха миниистир сервергэ, төлөпүөн лиинийэтигэр кыһалҕа үөскүү сылдьыбытын, кэлин оҥоһуллубутун туһунан кэпсээтэ. 8-800-700-2190 нүөмэринэн колл-кииҥҥэ эрийэн ыйыталаһыаххытын сөп.
Уруккуттан билиэт төннөрүллэр уонна төннөрүллүбэт диэҥҥэ арахсар. Төннөрүллүбэт билиэт буоллаҕына, ваучер да ылар кыаллыбат диэн эттэ. Маннык ваучерынан кэлин билиэти атыылаһыахха сөп.
Билиэт сууматын таһынан каасса хомуура (кассовый сбор) диэн баар. Өскөтүн “Якутия” хампаанньа каассатыттан буолбакка, атын сиртэн атыыласпыт буоллаххытына, бу хомуур сууматын төнүннэрбэттэр. Онон атыыласпыт суумаҕыттан кыра сууманы биэриэхтэрин сөп. “Якутия” каассата бу хомууру төнүннэрэр. Авиапорка баар каассалара түүннэри-күнүстэри үлэлиир. Кэнники Петр Алексеев уулуссатыгар саҥа каасса аһылынна.
Ону тэҥэ, миниистир “Якутия” авиахампаанньа соҕурууҥҥу хайысхаларга (холобур, Анапаҕа, Сочига) көтүүлэри арыйбытын туһунан иһитиннэрдэ.
Ангелина Васильева, “Саха сирэ” хаһыат, edersaas.ru