Август Егоров: «Тылдьыт суолтата улахан, туттарга табыгастаах, түргэн»

Саҥа электроннай сахалыы-нууччалыы тылдьыт улахан болҕомтону тарта. Бу туһунан дьон-сэргэ санаатын үллэстэр.

«Айар» национальнай кинигэ кыһатын салайар Август Егоров:

— Василий Мигалкин электроннай тылдьыта интэриниэт ситимэ күүскэ тэнийбит, Саха сирин баһыйар үгүс сирдэригэр түргэн интэриниэт тарҕаммыт, сыыппара эйгэтигэр киирии үгэнигэр саамай кэмигэр таҕыста дии саныыбын.
Бу тылдьыты Ф.В.Габышева үөрэх миниистиринэн, оттон Бырабыыталыстыба бэрэссэдээтэлин солбуйааччынан үлэлии сылдьан, Тыл бэлиитикэтигэр сүбэ эппиэттээх сэкиритээрэ Р.Р.Жиркова уонна биһиги кыһабыт бу киһи үлэтигэр өйөбүл наада диэн киллэрбит этиибитин өйөөн, тылдьыты оҥорбут В.В.Мигалкиҥҥа Үөрэх министиэристибэтиттэн үп-харчы көрдөрөн, саха тылын уонна литературатын кабинеттарыгар киллэттэрэн, өссө 10 сыл анараа өттүгэр «Саха Спеллер» диэн ааттанан, оччолорго CD диискэнэн оскуолаларынан тарҕаммыта.
Бу тылдьыт суолтата билиҥҥи кэмҥэ олус улахан, туттарга табыгастаах, түргэн. Кылаабынайа, интэриниэт баар буолуон наада. Үөрэнээччилэргэ, устудьуоннарга, учууталларга, тылбааһынан дьарыктанааччыларга, саха тылын үөрэтиэн баҕалаахтарга, уопсайынан саха тыллаах дьоҥҥо кимиэхэ баҕарар, биһиэхэ эмиэ, бэчээт эйгэтин үлэһиттэригэр олус көмөлөөх, туһалаах буолуоҕа.
Тылдьыкка итэҕэс-быһаҕас баар гынан баран, ситэриллэн-хоторуллан, тупсарыллан, эбиллэн истэҕинэ, холобура, тылын саппааһын өссө байыттахха, сахалыы таба суруйуу тылдьытын кытары дьүөрэлэһиннэрдэххэ, сахатытыы саҥа тиэриминнэрин киллэрдэххэ — суолтата, туттуллар ыыра, эйгэтэ өссө кэҥиэҕэ. Оччотугар бу тылдьыт инникитин туох баар интэриниэт ситимигэр сахалыыттан нууччалыы, нууччалыыттан сахалыы тута тылбаастыыр тиһиги оҥорорго сүрүн күүс, төрүт буолуон сөптөөх.
Онон бу тылдьыты 20-тэн тахса сылы быһа сыралаһан туран оҥорбут В.В.Мигалкиҥҥа барҕа махтал буоллун!

* * *

Саха тылын электроннай тылдьытын https://edersaas.ru/slovar/ киирэн көрүҥ.

Хаартыска «Айар» национальнай кинигэ кыһатын тиксэриитэ