2020 c Токиоҕа ыытыллыбыт Олимпиада кыайыылаахтара эдьиийдии-балыстыы гимнасткалар Дина Арина Авериналар MuusuSTAR бэстибээлгэ кэлэн успуорт дыбарыаһыгар кэнсиэргэ кыттыахтара.
СӨ художественнай гимнастикатын Федерациятын бэрэсэдьиэнэ Людмила Николаева:
— Художественнай гимнастика сулустара биһиги өрөспүүбүлүкэбитигэр кэлэн кыттыыны ылалларыттан олус үөрдүбүт. Дина уонна Арина тулууру, дьулууру, туруоруммут сыалы ситиһиини уонна бу успуорт көрүҥэ кэрэтин туоһулууллар. Биир былаһааккаҕа эдьиийдии-балыстыы Авериналары кытта алтыһыы биһиги федерациябыт гимнасткаларыгар эрэли, кыайыыга-хотууга дьулууру эрэ кынаттыа дии саныыбын. Чөл олоҕу тутуһалларыгар, бу успуорт көрүҥүнэн утумнаахтык дьарыктаналларыгар төһүү күүс буолуо дии саныыбын.
Бэлиэтээн эттэххэ, эдьиийдии-балыстыы Авериналары кытта уопсайа 150 гимнастка биир былаһааккаҕа кыттыаҕа. Ол курдук “Бриллианты Туймаады”, “Либерти”, “Сардаана”, “Сияние”, “РОФСО”, “Кристалл”, Хаҥаластааҕы ДЮСШ иитиллээчилэрэ кыттыахтара. Кэнсиэр туруорааччы режиссерунан Либерти салайааччыта Александра Бронских буолуоҕа.
Кэнсиэргэ киирии сайаапканан буолуоҕа. Сайаапкалары fhg-sakha@mail.ru ыытыахха сөп. Кэнсиэр «Кыайыы 50 сыла» успуорт дыбарыаһыгар кулун тутар 25 күнүгэр күнүс 16.00 чаастан саҕаланар.
Тэрээһини СӨ бырабыыталыстыбата уонна Росмолодежь иилээн-саҕалаан тэрийэллэр. Бэстибээл генеральнай партнерунан “Эльгауголь” уонна “Якутия” авиахампаанньа , “Транснефть” буолаллар. Информационнай партнердар – МУЗ ТВ, Rutube, ВКонтакте сайт.
Ульяна ЗАХАРОВА, «Саха сирэ» хаһыат