Бу күннэргэ Дьокуускай куоракка өрөспүүбүлүкэтээҕи “Сыл иитээччитэ-2019” куонкурус буола турар. Дьүүллүүр сүбэ 25 кыттааччыттан 11 лауреаты талла.
edersaas.ru
Куонкурус иккис күнүгэр кыттааччылар уһуйаан иитиллээччилэригэр дьарык ыыттылар, биир идэлээхтэрин кытта сатабылларын, уопуттарын үллэһиннилэр. “Сыл иитээччитэ-2012” Бүтүн Арассыыйатааҕы куонкурус муҥутуур кыайыылааҕа, Мэҥэ Хаҥалас улууһун Томтор уһуйаанын эбии үөрэхтээһиҥҥэ педагога Аркадий Афонскай маастар-кылааһын көрдүлэр.
Дьокуускай куораттааҕы “Парус” уһуйааҥҥа түөрт кыттааччы тиийэн кырачааннары умсугутар бииртэн-биир ураты, хатыламмат дьарыктары ыыттылар. Чурапчытааҕы “Кэскил” оҕону сайыннарар киин-уһуйаан иитээччитэ Нюрбина Слепцова оҕолорго “Салгын” тиэмэтин билиһиннэрдэ. “Куонкурус бэркэ саҕаланна. Тиэмэтин бэҕэһээ киэһэ талбыппыт. Түүнү быһа бэлэмнэнэн, оҕолорго кэлэн дьарыкпытын ыыттыбыт. Биир түүн иһигэр бэлэмнэммит дьарык диэтэххэ, бэйэм санаабар, табылынна, оҕолор туох эрэ саҥаны биллилэр. Дьүүллүүр сүбэ бэйэтэ туспа соруктаах, иитээччини бары өттүнэн көрөн сыаналыыр. Кинилэр этиилэрин, сүбэлэрин ылынан, инники дьарыктарга учуоттуохха сөп”, — диэн санаатын үллэһиннэ.
Уһун долгутуулаах кэтэһии кэнниттэн лауреаттар ааттара билиннэ. Урукку сылларга 10 лауреат бэлиэтэнэр эбит буоллаҕына, быйыл 25 кыттааччы баарыттан 11 педагогу таллылар.
“Сыл иитээччитэ-2019” өрөспүүбүлүкэтээҕи куонкурус лауреаттара:
1. Иванов Геннадий Владимирович (Сунтаар)
2.Алексеева Күннэй Анатольевна (Нам)
3.Сидорова Мария Ивановна (Ньурба)
4.Бояркина Вера Сергеевна (Дьокуускай)
5.Молчанова Ирина Алексеевна (Ленскэй)
6.Кларова Анна Анатольевна (Сунтаар)
7.Соловьева Евгения Ивановна (Хаҥалас)
8.Тимофеева Лилия Владимировна (Мирнэй)
9.Алексеев Алексей Алексеевич (Таатта)
10.Степанова Мари-Энн Алексеевна (Үөһээ Бүлүү)
11.Иванова Любовь Васильевна (Орто Халыма).
Бу талыллыбыт 11 лауреат салгыы биэс бастыҥ финалист ахсааныгар киирэр туһугар күрэхтэһиэхтэрэ. Биэтэк төһөнөн чугаһыыр, күрэхтэһии соччонон сытыырхайар. Муҥутуур кыайыылаах аата тэрээһин үөрүүлээх түмүктээһинигэр эрэ биллиэҕэ.
Людмила ПОПОВА, “Саха сирэ” хаһыат, edersaas.ru