Балыксыттар дьаарбаҥкалара быйыл ахсыс сылын ыытыллар.
Тэрээһин туһунан киин куорат олохтоохторо уонна ыалдьыттара тэҥнээн көрөн буолуо, санаалара араастаһар.
Матрена Попова, Дьокуускай куорат олохтооҕо:
— Мин сыл аайы балык дьаарбаҥкатыгар сылдьабын. 200 солкуобайга Кэбээйи соботун атыыластым. «Минньигэс балык миинэ» диэн аһымал аахсыйаҕа кыттан, 50 cолкуобайга сылаас чыыр балык миинин истим. Бу аахсыйаттан киирбит үбү элбэх оҕолоох дьиэ кэргэттэргэ түҥэтэллэрин истэн, суолталаах тэрээһиҥҥэ кытынным диэн үөрэн турабын.
Александр Аммосов, Дьааҥы улууһун олохтооҕо:
— Мин санаабар, былырыыҥҥыга тиийбэт тэрээһин. Олох аҕыйах хаһаайыстыба кыттыыны ылла. Балык көтөх курдук, онон кээмэйэ да кыра. Мин амсайыыга диэн биир чыыры атыыластым.
Кырдьык, бастакы күн киһи аҕыйах курдук этэ. Быйыл уу түһэн, балыксыттарга үгүс мэһэйдэри үөскэтэ сырытта.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.