Суһал ыстаап ойуур баһаардарынан ыытыллыбыт бэҕэһээ киэһээҥҥи мунньаҕар (от ыйын 28 күнүгэр) өрөспүүбүлүкэҕэ 132 айылҕа баһаара буола турарын туһунан бэлиэтээбит. Уоту умуруоруу үлэтэ 523 тыһ. гектар иэннээх 49 баһаарга ыытылла турар. Үөһээ Бүлүү, Горнай, Кэбээйи улуустарыгар балаһыанньа уустук.
Иһитиннэрбиттэринэн 7 улууска 12 ойуур баһаара тарҕаныыта бохсуллубут. Уоту утары 1832 киһи, 254 тиэхиньикэ үлэлиир. Бу кэмҥэ Амма, Сунтаар, Хаҥалас улуустарыгар саҥа уот барбыт сирдэрэ көстүбүттэр.
РФ Оборона министиэристибэтин сөмөлүөттэрэ Горнай улууһугар уоту умуруорууга үлэлээтилэр, 4 көтөр аал Үөһээ Бүлүүгэ, Мииринэйгэ, Хаҥаласка уонна Сунтаарга баһаары утары үлэлэргэ кытыннылар. Бе-200 эбиэт кэнниттэн Ньурбаҕа баар 40 №-нэн бэлиэтэммит баһаары умуллара көппүт.
Мунньахха ойуур баһаардара буола турар улуустар баһылыктара кыттыыны ылбыттар, кинилэр доброволецтар үлэлэрин табыгастаахтык туттууга этиилэри киллэрбиттэр.
Саха сиринээҕи гидрометсулууспа этэринэн, ааспыт күн Өймөкөөҥҥө быстахтык ардаабыт, Орто Халымаҕа кыратык түспүт. Бүгүн, от ыйын 29 күнүгэр, Саха сирин соҕуруу оройуоннарыгар, Нерюнгри, Алдан улуустарыгар быстах этиҥнээх ардахтар түһэллэрэ сабаҕаланар. Атын улуустарга кураан.
Саха сиригэр сүрүннээн тыаллаах күн-дьыл турар. Киин оройуоннарга хотугулуу-илин 5-10 м/с түргэннээх тыал. Хоту +12-+17 кыраадыс сылаас, киин улуустарга +19-+24, арҕаа +25-+30 кыраадыс сылаас.
Саха сиригэр атырдьах ыйын 5 күнүгэр диэри кураан, сылаас күн-дьыл турара сабаҕаланар.
Мунньаҕы иилээн-саҕалаан ыыппыт Дмитрий Садовников эрэгийиэҥҥэ уот кутталын балаһыанньата уустугун бэлиэтээбит. Күүстээх тыал турбута үлэни өссө уустугурдан биэрэрэ көстөр. “Аналлаах сулууспалар күүстэрин баһаардары умуруорууга ыытабыт. Ханна балаһыанньа уустугурарын көрөн эбии баһаарынайдары, доброволецтары суһаллык көһөрөр гына дьаһанарга кыһамньы ууруллар. Тыал үлэбитин уустугурдарын учуоттаан үлэлиэҕиҥ”, — диэтэ.
«Саха сирэ» хаһыат, edersaas.ru
Хаартыска sakha.gov.ru