Дьокуускайга кыбартыыраны куортамнаан баран, ону атын дьоҥҥо куортамҥа биэрэн харчыланар түөкүн санаалаахтар баар буолааччылар. Биир оннук чиэһинэйэ суох кыыһы полицейскайдар туттулар.
Ол курдук, Дьокуускай куорат полициятын 3 №-дээх отделыгар биир киһи сайабылыанньа киллэрбит. Биир кыыс кыбартыыра хаһаайкатабын, куортамҥа биэрэбин диэн, киниттэн биир ыйга 25 тыһ. солк. ылан баран, сүтэн хаалбытын туһунан.
Онтон сотору кэминэн биллибитинэн, кыбартыыра хаһаайына олох да атын киһи эбит.
Оперативниктар бу түөкүннээһиҥҥэ уорбалаан, 21 саастаах кыыһы туппуттар.
Барыллаан быһаарыынан, кыыс бэйэтэ бу кыбартыыраны куортамнаан олорбут. Онтон болдьоҕо бүтэн, дьиэни босхолууругар, «куортамҥа биэрэбин» диэн ис хоһоонноох биллэрии тарҕаппыт. Онуоха ити киһи киирэн биэрээхтээбит.
Бу чахчынан «Түөкүннээһин» ыстатыйанан холуобунай дьыала тэриллибитин туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн