Туох ыарыыны быһаараары боруоба ылбыттарый? Африка чумата атын дьиэ кыылларыгар тарҕанар дуо?
Бүгүн СӨ Бэтэринээрийэ департаменын салайааччытын Петр Лукич Петров брифинэ буолла. Кини Саратов уобалаһыттан Дьокуускайга аҕалыллан иһэр сибиинньэ этиттэн ылыллыбыт боруоба түмүгүнэн Африка чуматынан сутуллубутун быһаарбыттарын эттэ. Ол курдук, Аллара Бэстээххэ кэлбит 2 т тахса сибиинньэ этиттэн боруоба ылан Иркутскайга уобаластар икки ардыларынааҕы бэтэринээрийэ лабораториятыгар чинчийиигэ ыыппыттар. Ити түмүгэр, Дьокуускайга ыытыллыбыт эт чума бу көрүҥэр сутуллубута бигэргэммит.
Бэтэринээрийэ департаменын салайааччыта бу ыарыы сибиинньэлэргэ уонна кабаннарга эрэ тарҕанарынан, дьиэ атын кыылларыгар кутталы үөскэппэтин тоһоҕолоон бэлиэтээтэ. Социальнай ситимнэринэн тарҕанар сорох сымыйа сурахтарга итэҕэйимэҥ диэн сүбэлээтэ.
Ыарыылаах эти тутан ылан, анал сиргэ утилизацияҕа диэри харайбыттар.
Бэлэмнээтэ Женни Стрюкова
Хаартыска: интэриниэттэн