Аныгы олох сиэринэн, сыыппара хото киирэн, күннээҕи үлэбит-хамнаспыт барыта онно көһөн эрэр. Ол курдук, сотору кэминэн оскуола аттестата сыыппараҕа көһүө дииллэр.
“Саха сирэ” хаһыат, edersaas.ru
Ити туһунан РИА-новости иһитиннэрэр. “2020 сылга былааннаабыппыт эрээри, 2021 сылга олоххо киириэҕэ. Тоҕо диэтэххэ, бастатан туран, нормативнай баазаны уларытар ирдэнэр”, — диэн РФ цифровой сайдыыга, сибээскэ уонна маассабай коммуникацияларга министиэристибэтин департаменын дириэктэрэ Олег Качанов эппит. Ол эрээри, кумааҕы аттестатттан аккаастамматтар, тэҥҥэ туттуллуо диэбиттэр.
Итини тэҥэ, үрдүк үөрэх дипломун сыыппараҕа киллэрии туһунан кэпсэтии бара сылдьарын иһитиннэрбит. Билигин маннык докумуоннары сыыппараҕа көһөрүүнү куттала суох оҥоруу боппуруоһугар үлэлэһэ сылдьаллар үһү. Электроннай реестиргэ докумуону албыннаан оҥоруохтарын сөп дуо, диэн ыйытыыга министиэристибэ бэрэстэбиитэлэ оннук кыаллыбат диэн иһитиннэрбит. Итиэннэ цифровой аттестат, диплом түөкүннээһин уонна үөрэх докумуонун албыннаан оҥоруу түгэннэрин аччатарга көмөлөһүөҕэ диэн бэлиэтээбит.
Бука, аттестаты сыыппараҕа көһөрүү саҕалааһын эрэ буоллаҕа. Сыыйа туох баар докумуону барытын электроннай оҥороллоругар саарбахтааһын суох.
Людмила ПОПОВА, “Саха сирэ” хаһыат, edersaas.ru