«Росатом» хампаанньа Саха сиригэр Күчүстээҕи сир баайдаах учаастакка Арассыыйаҕа аан бастакытын сир үрдүнээҕи аччыгый кыамталаах атомнай ыстаансыйаны тутан үлэҕэ киллэриэҕэ. Бу сүүнэ эбийиэк өрөспүүбүлүкэ Арктическай улуустарын сайыннарыыга төһүү күүһүнэн буолуоҕа.
Бу туһунан бэҕэһээ, муус устар 18 күнүгэр, Ил Дархан Айсен Николаев РБК «День» диэн биэриитигэр кэпсээтэ.
— Дьоҕус кыамталаах атомнай ыстаансыйа бырамыысыланнай былааһакканы эрэ буолбакка, чугас сытар нэһилиэнньэлээх пууннары уотунан толору хааччыйыаҕа. Ону тэҥэ, таас чоҕу, көмүһү уонна хорҕолдьуну хостооһуҥҥа улахан көмөнү оҥоруоҕа, — диэн Айсен Сергеевич быһаарар. Ил Дархан сир баайын туһаҕа таһаарыыга кластернай ньыма олоххо киирдэҕинэ, Арктика социальнай-экэнэмиичэскэй өттүнэн саҥалыы тыыннанан сайдарыгар улахан көдьүүстээх буолуо диэн эттэ.
Аччыгый кыамталаах атомнай ыстаансыйа Усуйаана улууһун Уус Куйга бөһүөлэгэр 2028 сылга үлэҕэ киириэҕэ уонна, ортотунан, 60-ча сыл кэриҥэ туһаныллыаҕа. Эбийиэк үлэҕэ киирдэҕинэ, улууска уот сыаната икки төгүл түһэрэ күүтүллэр.