«Саха сирин амтана» гастрономия бэстибээлигэр сыл аайы кыттар «Атласовтар уһаайбалара» эрэстэрээн мэлдьи туох эрэ сонуну толкуйдуур буолан, тэрийээччилэр да, суруналыыстар бу тэрилтэттэн туох эрэ ураты интэриэһинэйи, хаһан да истибэтэхпитин уонна көрбөтөхпүтүн кэтэһэбит.
edersaas.ru
Быйыл да оннук буолла. Киэһэ 18 ч. нэһиилэ тулуйдубут. Суох, аччыктаан буолбатах, туох эрэ уһулуччулааҕы кэтэһэн!
Кэтэһиибит мээнэҕэ буолбатах эбит. «Киириҥ, күндү ыалдьыттар, биһиги эһигини кэтэстибит даҕаны!» — диэбитинэн икки ыал хаһаайкалара уонна аҕалара ыалдьыттары саха дьонун сиэринэн үөрэ-көтө көрсөллөр. Икки ыал — Атласовтар икки көлүөнэлэрэ: ийэлээх аҕа — Валентина уонна Василий, ону тэҥэ уоллаах кийиит — Николай уонна Валерия.
Киирээппитин кытта, Саҥа дьыллааҕы тыын биһигини кууһа оҕуста.
Манна Атылааһаптар өрүү аан дойдутааҕы уонна Арассыыйатааҕы таһымнаах ыраах дойдуттан кэлэр тэрээһиннэр ыалдьыттарын уонна туристары көрсөллөр.
Ыалдьыттар дьиэлээх хаһаайын Василий Атласовтан дьиэ ис оҥоһуутун, эрэстэрээн ортотугар турар көмүлүөк оһоҕу интэриэһиргээн бардылар.
Туспа остуолга куонкуруска кыттар астар: «Биһигини бастаан амсайыҥ!» — диэбиттии, «киэргэнэн-симэнэн» аҕай тэргэнэн тураллар.
Дьиэ кэргэн 2013 сылтан ыла «Атласовтар уһаайбалара» диэн туристскай-этнографическай комплекс быһыытынан фирменнай бэлиэлээх үлэлииллэр. Дьоҕус бизнес саҥаттан саҥа көрүҥэр ылсан эрэр дьиэ кэргэн, биллэн турар, эрэстэрээн бизнеһэ сайдыытыгар эмиэ тэтимнээхтик ылсар.
Бу туһунан Дьокуускай куорат уокуругун дьаһалтатын предпримательствоҕа уонна дьоҕус бизнескэ отделын салайааччыта Ирина Гаргач бэлиэтээтэ.
— Василий уонна Валентина Атласовтар Саха сиригэр туризмэйгэтин бастакы саҕалааччыларынан буолаллар. Бүгүҥҥү күҥҥэ «Атласовтар уһаайбалара» Дьокуускай куорат уонна Саха сирин биир киэн туттар туристскай-этнографическай киининэн буолан, саха норуотун абыычайын, сиэрин-туомун, олоҕун-дьаһаҕын, фольклорун, саха ыалын үгэстэрин пропагандиһынан буолар. Манна туристары саататар уонна сынньатар көрүҥ барыта баар. 2014 сылтан Атласовтар уоллара Николай кэргэнинээн Валериялыын саха аһын-үөлүн хайысхатыгар сонун көрүүлэри киллэрэн, олохтоохтук ылсан үлэлээн эрэллэр. Онон Атласовтар дьиэ кэргэн эрэстэрээннэрэ «Саха сирин амтана» гастрономия бэстибээлин биир саамай киэн туттар, холобур оҥостор тэрилтэтинэн буолар, — диэн бэлиэтээтэ мэрия эппиэттээх салайааччыта Ирина Гаргач.
Валентина Атласова алгыс сиэрин-туомун ыытыыта өрүү ыалдьыттар болҕомтолорун тардар. Бу да сырыыга оннук буолла.
Валентина Николаевна этэн-тыынан бардаҕына, оннооҕор кини бу сиэри-туому толоруутун үгүстүк истэр дьон, тугу барытын умнан туран, тыыммакка да истэбит…
Ыалдьыттар тустарынан этэ да барыллыбат — ыраах Японияттан кэлбит бочуоттаах ыалдьыт, бу дойду аатырбыт ресторатора Сибуити Косаки уонна Новосибирскай куорат уонна бу уобалас эрэстэрээннэрин бэрэсидьиэн, «Саха сирин амтана» бэстибээл дьүүллүүр сүбэтин биир бас көс эксперэ Владимир Бурковскай ыалдьыттарын көрсүү сиэрин-туомун толорор Валентина Атласованы видеоҕа устан үйэтиттилэр. Сибуити Косаки: «Тугу интэриэһиргээбиппин барытын ФБ, инстаграмҥа уган иһэбин»,— диэбитэ.
Онон Валентина Николаевна дьоппуоннары кытта сөхтөрөр буолла. Оттон Саха сиригэр кэлэн барбыт дьоппуон сорох туристара: «Бу биһиги сылдьыбыт сирбит!» — дииллэрэ буолуо.
Атласовтарга Владимир Бурковскай махтанан, кинилэри кытта хаартыскаҕа анаан түстэ.
Саха эстрадатын сулуһа Олимпия ыалдьыттары эҕэрдэлээн, эрэстэрээн этническэй ирдэбилигэр биһирэбил сыананы эбэн биэрдэ.
Дьокуускай куорат дьаһалтатын тэрээһинэ буолан, мэрия суруналыыстара уочаратынан сылдьан тэрээһини хото сырдаттылар. «Атласовтар уһаайбалара» эрэстэрээн куонкуруска кыттыытын Мариянна Васильева суруйар буолан, суруналыыс хаартыскаҕа хото түһэрдэ.
«Атласовтар уһаайбалара» эрэстэрээн былырыын экспердэргэ кырдьаҕас этин амсатан соһуппута. Быйыл Николай Атласов бэйэтэ оҥорор фирменнэй «Ыччуу!» мороженайынан уонна бу хаартыскаҕа көстөр тоҥ ас үрдүгэр сытар таба сиир лабыктатынан оҥоһуллубут аһыы карамель кэмпиэтинэн сөхтөрдө. Манна өссө «Үс Кут» билимиэн пюре-миинэ, ыыһаммыт кус этин салаата, араас отонтон оҥоһуллубут соус, собо искэҕэ эбиликтээх саламаат, онтон да атын киһи сонургуу уонна үөрэ амсайар күндү астара куонкуруска «кииристилэр».
— «Атласовтар уһаайбалара» эрэстэрээн аһын араас көрүҥэ олохтоох эттэн, балыктан, үүттэн, булт аһыттан астанар буолан, аатырыан аатырар эбит! — диэн экспердэр олус сөхтүлэр. Онон бу эрэстэрээн аата «Триумф» спортивнай комплекска ыытыллар «Кыһын Саха сириттэн саҕаланар» тэрээһиҥҥэ дорҕоонноохтук ааттанара буолуо диэн эрэнэбит.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.