2003 сыллаахха атипичнай пневмониянан ыалдьыбыт дьоҥҥо (бу ыарыыны SARS-CoV-1 вирус көбүтэр этэ) көстүбүт антителалар, саҥа тииптээх SARS-CoV-2 вируһу утары дьайыахтарын сөп диэн түмүккэ АХШ уонна Швейцария учуонайдара Дэвид Вислер уонна Дэвид Корти кэллилэр.
edersaas.ru
Бу чинчийии түмүктэрин Nature сурунаалга бэчээттээбиттэр. Атипичнай пневмониянан ыалдьыбыт дьон этигэр-сиинигэр үөскээбит S309 диэн бэлиэтэммит антителалар коронавирус сарайбыт “муостарын” алдьатар кыахтаах эбит. Ити белковай “муостара” тоһуннаҕына, коронавирус тыыннаах клеткаҕа сатаан киирбэт буолар эбит. Учуонайдар COVID-19 ыарыыны көбүтэр SARS-CoV-2 коронавирус клеткаҕа киирэр ньымата SARS-CoV-1 курдук буолуон сөп, оччоҕо бу антителалар саҥа ыарыыны утары эмиэ үлэлиэхтэрин сөп диэн санааҕа кэлбиттэр. Бу антителалар көмөлөрүнэн ыарахан ыарыһахтары эмтиэххэ сөп, ону таһынан, ыарыыга ордук бэринимтиэ дьону профилактикалыырга туттуохха сөп диэн бу ыстатыйаҕа суруллар.
Хаартыска https://rcmm.ru
Егор Карпов, «Саха сирэ» хаһыат, edersaas.ru