Горнай улууһун Атамай нэһилиэгэр «Туругур, үлэ!» диэн бэртээхэй субуотунньук ыытылынна. Дьон-сэргэ олус көхтөөтүк кытынна.
Атамайга элбэх функцияны толорор киин (МФЦ) тутуллар сирин ыраастааһыныгар нэһилиэкпит эр дьоно түмсэн, үлэ-хамнас тигинээн олордо. «Норуот күүһэ — көмүөл күүһэ» диэн, дьэ, манныгы этэр буоллахтара. Манна нэһилиэк ытык кырдьаҕаһа Савва Николаевич Алексеев субуотунньукка эдэр ыччаты кытары тэбис тэҥҥэ үлэлээн, дойдулаахтарын үөртэ, холобур буолла. Онтон нэһилиэк Далбар хотуттара, кыргыттара көхтөөх үлэттэн туора турбакка, үөрэ-көтө ас астаатылар, үлэһит эр дьону минньигэс аһынан күндүлээтилэр.
Бэртээхэй үлэнэн элбэх функцияны толорор киин тутуллуохтаах сирэ-уота ыраастанна. Маныаха бу күн ыраахтан-чугастан тиэхиньикэлээх дьон нэһилиэк сайдарын туһугар бары кыһамньыларын ууран кыттыыны ылбыттара махталлаах. Ол курдук, үс Камаз, биэс тыраахтар, 1 погрузчик үлэлээтилэр. Нэһилиэк баһылыгын э.т. Айсен Егорович Павлов бар дьонун түмэ тардан сүҥкэн үлэни ыытта. Тыа сирин сайдыытыгар маны да таһынан элбэх үлэ былааннанара этилиннэ. Ол курдук, күһүн көҕөрдүү үлэтэ ыытыллыахтааҕа дьону-сэргэни үөртэ. Субуотунньук кыттыылаахтара нэһилиэктэригэр туһалааҕы оҥорбуттарыттан улаханнык үөрдүлэр, сүргэлэрэ көтөҕүлүннэ.
Валентина Яковлева,
Горнай, Бэс Күөл.
Хаартыскалар, видео ааптар тиксэриилэрэ