Бу күннэргэ Горнай улууһун Бэс Күөлүгэр ойуур баһаарыттан дьиэлэрэ умайбыт дьоҥҥо көмөлөһөр нэһилиэктээҕи хамыыһыйа үлэтэ күөстүү оргуйар.
Атамай нэһилиэгин дьаһалтатын пресс-киинэ иһитиннэрбитинэн, уоттан дьиэтэ эмсэҕэлээбит дьон ахсаана — 189 киһи. Онтон 12 ыал — элбэх оҕолоох дьиэ кэргэн, кыаммат ыал — 5, үлэ бэтэрээнэ — 11 киһи, инбэлиит — 7 киһи, биэнсийэлээх — 24 киһи. Кинилэргэ бырабыыталыстыбаттан бастакы кэмҥэ 30 тыһ. солк. көмө оҥоһулунна.
Хамыыһыйа эмсэҕэлээбит ыал дьиэ иһинээҕи малын-салын, сыаннастарын ааҕыыга Горнай улууһун дьаһалтатын кытта анал реестири оҥорор.
Уокка эмсэҕэлээбит, былдьаммыт от, дьиэ сүөһүтэ испииһэгэ оҥоһуллан, тыа хаһаайыстыбатын министиэристибэтиттэн туспа көмө көрүллүөҕэ.
Бырабыыталыстыба бэрэссэдээтэлин солбуйааччы Дмитрий Бердников тутуу министиэристибэтин салалтатын кытта хамыыһыйа тэрийэн, дьиэ тутуутугар үлэ ыыталлар.
Эмсэҕэлээбит ыалларга уокка былдьаммыт дьиэ иэнин тэҥнээҕи тутуохтара. Ким баҕалаахха харчынан компенсация оҥоһуллуоҕа.
Елена ПОТОЦКАЯ, «Саха сирэ» хаһыат.
Хаартыска: atamay_official инстаграм страницаттан.