Горнай улууһун Атамай нэһилиэгэр, киириигэ, саргылаах Саҥа дьыл үөрүүтүн көрсө чаҕылхай өҥнөөх арт-эбийиэк оҥоһуллан туруоруллуута олохтоохтору үөрдэр, сэргэхситэр.
Бу туһунан нэһилиэк баһылыгын солбуйааччы Алла Павлова иһитиннэрдэ:
—Дойдуга бэриниилээх буолуу сылынан нэһилиэкпитигэр олохтоох урбаанньыттар уонна мантан куорсун анньыммыт урбаанньыт дьоммут төрөөбүт сирдэригэр умнуллубат бэлэҕи оҥороллор. Бэйэлэрин үптэринэн-харчыларынан кыттыһан, Саҥа дьыл үөрүүтүн үксэтиһэн, арт-эбийиэги оҥорон, бөһүөлэккэ киириигэ туруордулар. Аны, манна уота-күөһэ ситэриллиэхтээх. Ол кэнниттэн үөрүүлээх арыйыы тэрээһинигэр, куонкурус кыайыылааҕар — бырайыак ааптарыгар, урбаанньыттар бириистэрин туттарыахтаахтар.
Бу харахха ыраахтан быраҕыллар, киһи сэргии, үөрэ-көтө уонна киэн туттар бэлиэтин оҥорууга Петров Алексей Алексеевич, Петров Семен Алексеевич, Филиппов Дмитрий Александрович, Жирков Станислав Егорович, Федоров Александр Афанасьевич, Яковлев Станислав Александрович, Васильев Алексей Агеевич, Попов Анатолий Николаевич, Иванов Никифор Николаевич, Колесов Ньургун Петрович, Васильев Альберт Михайлович, Винтоняк Евгений Михайлович, Васильева Луиза Яковлевна, Ефремова Саргылаана Николаевна, Винокуров Иннокентий Афанасьевич кыттыстылар. Маны сэргэ, Мыреев Геннадий Иванович туттар матырыйаалларыгар чэпчэтиилэри оҥорон, тэрээһин үлэлэригэр кыттыһан, бэйэтин кылаатын киллэрдэ.
Атамайдар улаханнык үөрэн-көтөн тураммыт, урбаанньыттарбытыгар, нэһилиэк тупсаҕай көстүүлэнэригэр өйөбүл буолар дьоммутугар махтанабыт. Үтүө санаалаах дьон өйөбүлүнэн нэһилиэкпит үүнэ-сайда, чэчирии турарыгар эрэнэбит, — диэтэ.
