Горнай улууһун Атамай нэһилиэгэр Арассыыйа күнүн олус сэргэхтик бэлиэтээбиттэр. Хаһыат сыл аҥаардааҕы сурутуутун ытык кырдьаҕастарыгар бэлэх ууммуттар, Кыайыы болуоссатыгар сибэкки олордубуттар, волонтердарга махтаммыттар.
Ол туһунан бэйэлэрин инстаграмнарыгар таһаарбыттар. Бу күн Кыайыы болуоссатыгар Арассыыйа өрөгөйүн ырыата ньиргийэн дьону-сэргэни уруйдуу-айхаллыы көрсүбүт. Нэһилиэк баһылыга Р.К.Федоров коронавируһу бохсуу кэмигэр волонтердаан дьоҥҥо-сэргэҕэ көмөлөспүт уонна көмөлөһө, өйөбүл буола сылдьар Д.Филипповка, Н.Ковровка, А.Семеноваҕа, А.Бабарановаҕа дохсун ытыс тыаһыгар доҕуһуоллатан Махтал суруктары уонна сэмэй бэлэхтэри туттарбыт.
Салгыы тыыл бэтэрээннэригэр С.К.Федоровка, В.Г.Ивановаҕа Улуу Кыайыы 75 сылын чэрчитинэн, «Саха сирэ» хаһыат сыл аҥаардааҕы сурутуутун бэлэхтээбитин бар дьонун үөрдүбүт. Маны сэргэ, нэһилиэк сэбиэтэ тыыл бэтэрээнигэр Н.Г.Жирковка «Байанай» сурунаал сыл аҥаардааҕы сурутуутун, В.Д.Лонгинов аатынан Атамай орто оскуолатын кэлэктиибэ тыыл бэтэрээнигэр В.Е.Сухановаҕа «Саха сирэ» хаһыат сыл аҥаардааҕы сурутуутун бэлэхтээн, дьон-сэргэ махталын ылбыттар.
Нэһилиэк далбар хотуттара Кыайыы 75 сылыгар аналлаах «Улуу Кыайыыны уруйдаан, сибэкки дьөрбөтүн үүннэриэх» үтүө санаа аахсыйатын тэрийэннэр, хас биирдии бэйэлэрэ уоннуу сибэкки арассаадатын Кыайыы болуоссатыгар олордон, симээн-киэргэтэн, тупсаран, харахха ыраахтан быраҕыллар кэрэ көстүүлээбиттэр. Субуотунньук тэриллибитэ сүргэни улаханнык көтөхпүт.