Бэс ыйын 25 күнүттэн от ыйын 1 күнүгэр диэри РФ Төрүт Сокуонугар уларытыылары киллэриигэ Бүтүн Арассыыйатааҕы куоластааһын ыытылла турар.
Горнай улууһун Атамайдааҕы 174 №-дээх куоластыыр учаастакка (бэрэссэдээтэл А.И.Ефремова), аан дойдуга турбут коронавирус дьаҥын тарҕаппат туһуттан, дьону дьаҥтан-дьаһахтан көмүскүүр сириэстибэлэринэн толору хааччыллыбыттар.
Куоластыыр учаастак үлэһиттэрэ, кэтээн көрөөччүлэр бары мааскалаахтар, бэрчээккилээхтэр, сирэйдэригэр анал хаххалаахтар, халааттаахтар. Ону таһынан, хантаага суох тэйиччиттэн кыраадыһы мээрэйдиир термометрдаахтар, дезинфекциялыыр сириэстибэлэр бааллар диэн олохтоох дьаһалта пресс-сулууспата иһитиннэрдэ.
Куоластыыр учаастакка социальнай дистанцияны тутуһарга анал бэлиэлэр туруоруллубуттар. Киирии-тахсыы ханна баҕарар курдук, тус-туһунан ааннаммыт. Онон дьон тоҕуоруһуута тахсыбат диэн бэлиэтээн этэллэр.
—Бүгүн номнуо төрдүс күнүн куоластыыр учаастак толору эрэсииминэн үлэлээтэ. Киирбит сайабылыанньаларынан, дьиэлэригэр куоластааччыларга, ону таһынан ыраах олорор дьоҥҥо, «Ампаардаах» сайылыгар, хамыыһыйаттан тиийэн куоластааһыны ыыттылар. Маны сэргэ, быйыл аан бастаан кыттар 8 эдэр куоластааччыга олохтоох дьаһалта аатыттан эҕэрдэ суруктаах сэмэй бэлэхтэр туттарылыннылар. Бүгүн киэһээҥҥи көрдөрүүнэн, Атамай нэһилиэгэр болдьоҕун иннинэ куоластааһыҥҥа 279 киһи кытынна, — диэн иһитиннэрэллэр.
Оттон нэһилиэк уопсастыбаннай сэбиэтин бэрэссэдээтэлэ Диана Данилова:
—РФ Төрүт Сокуонугар уларытыылары өйүүбүн. Дойдубут, сокуоммут туһугар кыһаллыахтаахпыт дии саныыбын. Бары да олохпут сайдарын туһугар куоластаан эрдэхпит. Ордук тоһоҕолоон, социальнай хайысхаларга улахан болҕомто ууруллубутун биһириибин.
