Билиҥҥи туругунан, Горнай улууһун Бэс Күөлүгэр нэһилиэк тула уот кыыма билигин да күөдьүйэн тахса турарынан, олохтоох эр дьон биригээдэлэрэ түүннэри-күнүстэри дьуһуурустубалаан уоту тута умуллараллар.
«Хайа эмит диэки уоту көрдөххүтүнэ, ол сири маныыр биригээдэлэргэ тиийэн биллэрэргитигэр», — диэн суруйар олохтоох дьаһалта инстаграмҥа бэйэтин страницатыгар.
Маны таһынан, олохтоох дьаһалта пресс-киинэ кимтэн туох көмө киирэрин тута иһитиннэрэ-биллэрэ олорор.
Ол курдук, бу күннэргэ баһаарга эмсэҕэлээбит ыалларга өрөспүүбүлүкэ араас муннуктарыттан көмө оҥоһуллар.
Ким аһынан, ким миэбэлинэн, ким харчынан көмө ыытар, сорохтор Атамайга бэйэлэрэ илдьэн биэрэллэр.
Бэс Күөлүн олохтоохторо көмөҕө илиилэрин утары уунар дьоҥҥо «оҥорор үтүө дьыалаҕыт сүүс төгүл махталлаах буоллун!» диэн ис сүрэхтэриттэн махталларын тиэрдэллэр.
Елена ПОТОЦКАЯ, «Саха сирэ» хаһыат.
Хаартыска — atamay_official инстаграм страницаттан