Горнай улууһун Атамай нэһилиэгэр ыам ыйын 15 күнүгэр Дьокуускайтан өрөспүүбүлүкэтээҕи онкологическай диспансер быраастара
нэһилиэк олохтоохторун доруобуйаларын туругун көрөн-истэн бардылар.
Киһиэхэ биирдэ бэриллэр олоҕор доруобуйа сүрүн миэстэни ылара чахчы. Киһи чэгиэн-чэбдик доруобуйалаах буоллаҕына тулалыыр эйгэтэ сырдыгынан сыдьаайар, табыллыы, ситиһии эҥэрдэһэр.
Үрүҥ халааттаах аанньаларбытыгар көрдөрүнэн, сөптөөх диагноһы туруораннар, эмтээннэр, иккис тыыны бэлэхтээтилэр. Биһиги кинилэргэ муҥура суох махтанабыт. 21-с үйэ тэтимнээх технологиятын биһиги ыччат дьоммут чиҥник баһылаабыттар эбит.
Урукку кэми санаатахха, соҕурууттан Сахабыт сиригэр миэдик идэтин ылан нуучча кыргыттара, уолаттара кэлэн мутук тостор тыйыс тымныыны аахсыбакка, дьон доруобуйатын тупсуутугар сүҥкэн кылааттарын киллэрбиттэрэ. Үөрэх, билии сайдыыта биир миэстэҕэ турбат. Сахабыт сирэ бары өттүнэн чэчирии сайдан, үрдүк, орто үөрэх салаалара аһыллан, ыччат дьоммут билии-көрүү аартыгын ылан, талбыт идэлэринэн өрөспүүбүлүкэбит араас муннуктарыгар таһаарыылаахтык үлэлииллэр, сайдыыны киллэрэллэр.
Горнай улууһугар диспансеризация сыллата ыыталлар. Атамай нэһилиэгин учаастактааҕы балыыһата нэһилиэнньэҕэ куораттан быраастар кэлэллэр диэн биллэрэн, дьон кэлбит быраастарга көрдөрүннүлэр. Ыраата барбакка, миэстэтигэр киһи көрдөрүнэрэ олус табыгастаах.
Хас биирдии быраас олус элэккэй, сайаҕас майгылаах эбит, олохтоохтору болҕомтолоохтук көрдүлэр. Ол курдук, онколог Ноговицын Евгений Анатольевич, онкогинеколог Кириллина Элеонора Николаевна, хаан ылар сиэстэрэ Ефимова Екатерина Степановна уонна УЗИ-аппараакка көрөр Павлова Нина Николаевна нэһилиэнньэ доруобуйатын туругун көрөн бардылар.
Үрүҥ халааттаах аанньалларбытыгар махтанабыт. Эһиги баар буолаҥҥыт биһиги тирэхтээхпит, инникигэ эрэллээхпит. Сир үрдүгэр баар бары үтүөнү-кэрэни, уйгуну-быйаҥы!
Бэс Күөлтэн Валентина Николаевна Яковлева.