Горнай улууһун Атамай нэһилиэгин дьаһалтатын ыччат дьыалатыгар отдела уонна «Дьулуур» СК Саҥа дьылга «Кыһыҥҥы остуоруйа» диэн хаар оҥоһуктарга, тиэргэни киэргэтиигэ күөн күрэһи тэрийэн ыыттылар.
Тиэргэнигэр Диснейленд сынньалаҥ сири хаарынан оҥорбут Борис Иванов бастакы миэстэни ылан дьон-сэргэ эҕэрдэтин тутта. Иккис бириистээх миэстэҕэ Александрия Габышева «Чысхааннаах Хаарчаанаҕа ыалдьыттыаҕыҥ» оҥоһугунан таҕыста. Үһүс бочуоттаах миэстэни Августина Карбаканова хаартан 2021 cыл бэлиэтин — Оҕуһу, Златислава Иванова Саҥа дьыл үөрүүтүн-көтүүтүн оҥорон, иккиэн ыллылар. Кыайыылаахтарга махтал суруктар уонна сыаналаах бириистэр туттарылыннылар.
Эдэр ыал ийэтин Александрия Габышеваны кытары төлөпүөнүнэн сибээстэһэ сырыттым. Кини ХИФУ Автодорожнай факльтетын 5 кууруһун устудьуона. Кэргэнэ Владислав Нам улууһуттан төрүттээх. Эдэр ыал оҕо саадыгар сылдьар кырачаан кыыстаахтар.
— Хаар оҥоһукка бу аан бастакы холонуум. Кэргэним ахсынньы саҥатыттан саҕалаан хаары чөмөхтөөбүтэ, муспута. Киэһээтин тиэргэммит сандааран олордун диэн уотун-күөһүн тарта. Оттон Чысхааны, Хаарчаананы оҥорууга мин ылыстым. Урут хаһан да маннык оҥорботох буоламмын, гараастан туох көстүбүтүнэн чочуйдум. Боростуой харандааһынан таҥастарын-саптарын оһуорун-мандарын уруһуйдуу-уруһуйдуубун шпателинэн (дьиэни сыбыырга туттар кыра, чараас лаппаакытыҥы тэрил) хаары аргыыйдык кыһан, быһан-отон таһаардым. Хата, сиэссийэм кэмэ буолан, ыксаабакка наҕыллык оҥордум.
Ону сэргэ, А4 кумааҕыга араас ойуулары түһэрэн, ону резагынан быһан, түннүкпүтүн киэргэттим. Кумааҕыттан араас ойууну-бичиги, оһуору-мандары кырыйарбын уонна уруһуйдуурбун оҕо эрдэхпиттэн сөбүлүүбүн. Быйыл оҕобут детсадыгар Саҥа дьылы көрсө эмиэ кумааҕынан киэргэл күрэһигэр дьиэ кэргэнинэн кыттаммыт, бастакы миэстэни ылан үөрүүбүт улахан.
Батмаҥҥа икки харыйа ойуутун түһэрэн баран эмиэ резагынан быспытым. Уонна иккиэннэрин сыһыаран баран, араас кылабачыгаһынан, аска туттуллар фольганан оонньуурдары оҥорон, ону хоппуруон сапка иилэн, харыйаны киэргэтэн биэрдим. Остуолга киэргэл курдук туруоруохха сөп, — диэн кэпсээтэ.
Хаартыскаларга уонна видеоҕа Александрия Габышева оҥоһуктарын көрөҕүт.