«Атах тэпсэн олорон»: Саха тыйаатыра ыччакка ускуустуба эйгэтин билиһиннэрэр

Артыыс уонна учуутал идэлэрэ алтыһар түгэннэрдээҕин Дьокуускайдааҕы педагогическай кэллиэс устудьуоннара Саха тыйаатырын артыыстарын кытта аһаҕас кэпсэтиигэ бэлиэтии көрдүлэр. 

Кулун тутар 29 күнүгэр өрөспүүбүлүкэбит 100 сылын көрсө былааннаммыт тэрээһиннэр чэрчилэринэн, П.А.Ойуунускай аатынан Саха академическай тыйаатыра С.Ф. Гоголев аатынан Дьокуускайдааҕы педагогическай кэллиэс устудьуоннарыгар ыалдьыттаата. Көрсүһүүгэ саха норуотун киэн туттуулара, Улуу убайдарбыт диэн ытыктаан ааттыыр дьоммут: Былатыан Ойуунускай, Алампа Соппуруонап, Өксөкүлээх Өлөксөй, Махсыым Омуоһап уобарастарын толорор артыыстар СӨ үтүөлээх артыыһа Дьулустаан Семенов, СӨ култууратын туйгуна Николай Протасов, эдэр кэскиллээх артыыстар Александр Борисов, Вячеслав Лавернов уонна тыйаатыр сүрүн режиссера, СӨ ускуустубатын үтүөлээх диэйэтэлэ Руслан Тараховскай кыттыыны ыллылар.

Руслан Игоревич учуутал идэтигэр уһуйулла сылдьар эдэркээн дьоҥҥо саха саарыннара өрөспүүбүлүкэ автономията олохтоноругар уонна тыйаатыр историятыгар сүҥкэн кылааттарын туһунан билиһиннэрдэ. Артыыстар устудьуоннаабыт кэмнэриттэн, идэлэрин хайдах саҕалаабыттарын, баһылаабыттарын туһунан сэһэргээтилэр. Итиэннэ оҕолор ыйытыыларыгар хоруйдаан, уобараска киирии уустуктарын, элбэх тылы өйгө үөрэтии кистэлэҥнэрин билиһиннэрдилэр, идэни таба тайаныы олоххо быһаарар оруоллааҕын туһунан санааларын үллэһиннилэр. Ол кэмҥэ Саха тыйаатырын худуоһунньук-гримера Айталаана Сергеева кэпсэтии кыттыылаахтарыгар артыыстары уобарастарыгар чугаһатан чочуйуу маастарыстыбатын билиһиннэрдэ.

Режиссер Руслан Тараховскай бэлиэ сылга анаан өссө икки испэктээги туруорар былааннааҕын билиһиннэрдэ. Саха тыйаатырын бастакы дириэктэрэ, саха литературатын төрүттээччилэриттэн биирдэстэрэ, талааннаах драматург, бэйиэт Алампа уонна Саха сэбиэскэй социалистическай өрөспүүбүлүкэтин олохтоспут, Киргизия уонна Казахстан уобаластарын салайааччытынан үлэлээбит Махсыым Омуоһап олохторун, Сахабыт сирэ сайдыытыгар кылааттарын, оччотооҕу кэм ыар тыынын туһунан ыччакка, дьоммутугар-сэргэбитигэр билиһиннэрэр туруорууну былаанныырын режиссер кэпсээтэ.

Саха тыйаатыра уонна педагогическай кэллиэс Саха АССР 100 сылын көрсө өссө былырыын сөбүлэҥ түһэрсибиттэрэ. Ыаллыы турар тэрилтэлэр эдэр көлүөнэни өй-санаа уонна духуобунас таһымыгар иитэр сыалтан ситимнээх уонна тиһиктээх үлэни саҕалаатылар. Ааспыт өрөбүллэргэ үс куурус устудьуоннара «Бүтэһик малыыппа» диэн И.Вилквист пьесатынан режиссер Василий Борисов туруорбут испэктээгигэр сырыттылар. Онтон сотору кэминэн кинилэргэ анаан Саха тыйаатырын түмэлигэр экскурсия тэриллиэҕэ. Мантан саас холбоһуктаах үлэ икки тэрилтэ – арыыстар уонна устудьуоннар кыттыылаах «Семинария паартатыттан автономия трибунатыгар» диэн театрализованнай туруоруунан түмүктэниэҕэ. Режиссер быһыытынан С.Ф. Гоголев аатынан Дьокуускайдааҕы педагогическай кэллиэс уһуйааччыта, СӨ култууратын туйгуна Иван Новиков, онтон Саха тыйаатырын өттүттэн артыыс Илья Стручков үлэлиэхтэрэ.

Көрсүһүү Руслан Тараховскай Алампа Соппуруонап хоһоонноругар суруйбут ырыаларын Илья Стручков уонна Александр Борисов толорууларынан түмүктэннэ.

Сиибиктэ Петрова,

П.А.Ойуунускай аатынан

Саха академическай тыйаатырын пресс-сулууспата.