Бу ааспыт өрөбүлгэ, бэс ыйын 3 күнүгэр, интэриниэт ситимигэр тахсыбыт видеоролик улахан айдааны таһаарда. Маныаха киһи сэрэхэдийэрэ диэн — бу быһылаантан сэдиптээн, сорох-сорохтор олус күүркэтэн, омугумсуйууга тиэрдэ сатыыллара.
Ол видеоҕа туох уһуллубутуй? Дьокуускай куоракка «Студгородок» оройуонугар баар атах таҥаһын өрөмүөннүүр дьоҕус мастарыскыайга орто саастаах саха киһитэ («бомж» дэнэр) омук киһититтэн 220 солк. көрдүүр. Онуоха бу сордооҕу харахтарын симтэрэн баран, атах таҥаһын хара кырааскатынан сирэйин бүтүннүү ыстаран кэбиһэллэр. Бэйэтэ да онно туран биэрэр. Кыраасканан ыстарааччылар күлсэллэриттэн уонна акценнарыттан иһиттэххэ, иккиэн омук дьоно.
Устааччылар ити видеоларын интэриниэккэ таһаарбатахтара буоллар (тоҕо, туох сыалтан бар дьон көрүүтүгэр таһаардылар?), киһини итинник атаҕастааһын, сэнээһин, күлүү-элэк оҥостуу отой даҕаны биллибэккэ хаалыа эбит.
Онуоха баара, хата диэххэ, «акаарыларыгар» дьон көрүүтүгэр таһааран, быһа түһэн эттэххэ, тосторун ыллылар. Сол күн Тургун Попов салайар «Урааҥхай» спортивнай кулуубун уолаттара ол мастарыскыайга тиийэн, кыраасканан ыһыыга уорбаланааччы Карен Мартиросяны тутан ылан, бэйэтин сирэйин соннук кыраасканан ыстарбыттар. Биллэн турар, кыһыйбыт-абарбыт дьон туттара-хаптара кытаанаҕа өйдөнөр.
Ити кэнниттэн мастарыскыай дьиҥнээх хаһаайына, аҕам саастаах эрмээн киһитэ, эмиэ видеоҕа быһаарбытынан, кини хас да күн атын сиргэ сылдьыбыт, үлэһиттэрэ итинник дьаабыламмыттарын истибэтэх-билбэтэх, ол эрэн, бүтүн Саха сирин дьонуттан бырастыы гынарыгар көрдөспүт.
Оттон СӨ Гражданскай уопсастыба институттарын сайыннарыы миниистирин бастакы солбуйааччы Иван Луцкан куорат олохтоохторун провокацияҕа киирэн биэрбэттэригэр эппитэ, бу сиэрэ суох быһыы хайдах быһаарылларын хонтуруолга туталларын иһитиннэрбитэ.
Оттон Саха сирин эрмээннэрин сойууһун бэрэссэдээтэлэ Андраник Навоян итинник кэбилэммит биир дойдулаахтарыттан саатарын, кинилэри кытта бэйэлэрэ эмиэ кэпсэтиэхтэрин, накаастыахтарын туһунан эрэннэрбитэ.
Бүгүн ол кыраасканан ыстарбыт ускул-тэскил сылдьар саха киһитэ News.Ykt.Ru сайтка биэрбит интервьютугар Каренныын билсибиттэрэ хас да сыл буолбутун, бу эрмээн киһитэ киниэхэ көмөлөһөрүн, аһатарын туһунан эппит, кинини туохха да буруйдаабаппын диэбит. Ол эрэн, Карен «таҕыстахпына, кэпсэтиэхпит» диэбититтэн дьаахханар курдук хоруйдаабыта эмиэ баар. Онон, кинини, арааһа, үчүгэйдик «обработкалаабыттар», куттаабыттар да быһыылаах диэн сабаҕалыахха сөп.
Бэс ыйын 5 күнүгэр бу киһини дьону быстах кэмҥэ тутар «Тирэх» кииҥҥэ киллэрбиттэр.
Дьокуускай куорат федеральнай суутун пресс-сулууспата:
— Бэс ыйын 5 күнүгэр Арменияттан төрүттээх предприниматель Карен Вараздатович МАРТИРОСЯН «күлүгээннээһин» ыстатыйанан буруйданар административнай дьыалата Дьокуускай куорат федеральнай суутугар көрүлүннэ. Дьыаланы судьуйа Н.Р.Шевелев көрдө. Суут мунньаҕар Мартиросян оҥорбут буруйун билиннэ.
Суут кинини уопсастыбаннай бэрээдэги кэһиигэ, киһиэхэ убаастабыла суох сыһыаҥҥа буруйдааҕынан билиннэ. Итиэннэ накаастабыл миэрэни аныырыгар, сууттанааччы буруйун билиммитин уонна кэмсинэрин сымнатар өрүттэр быһыытынан учуоттаан, Мартиросяны 5 сууккаҕа хаайарга уурда.
Бүгүн, бэс ыйын 6 күнүгэр, Дьокуускай куорат федеральнай суутугар Тургун Попов РФ Административнай кодексатын 20.1-с ыстатыйатынан, ол эбэтэр, күлүгээннээһиҥҥэ буруйданар дьыалата көрүлүннэ. Дьыаланы судьуйа Алексеева көрдө. Суут уурааҕынан, Попов 1000 солк. ыстараап төлүүр буолла.
Оттон социальнай ситимнэринэн Тургун Попову өйүүр сыаллаах флеш-мобка кыттарга ыҥырыы тарҕанна.
Бу түбэлтэттэн туох быстах түмүгү оҥоруохха сөбүй?
Сокуон хараҕынан, киһини («бомж» да киһи) сэнээн атаҕастааччы уонна бэйэ сууттааһынын оҥорбут көмүскээччилэр административнай миэрэнэн накаастаммыттара сөп (саха уолаттарыгар холуобунай дьыаланы тэрийбэтэхтэригэр махтал). Итинник, түҥ-хааһах дьон курдук сокуонунан киирсибэккэ, «самосуд» оҥорор табыллыбат. Уолуктарынан тыыммыт уола хааннар онно-манна киирэн биэриэхтэрин сөп. Онон, икки өрүттэр оҥорбуттарыгар иккиэн эппиэттээбиттэрэ сөп.
Оттон иккис өттүнэн, саха буоларым быһыытынан, «көмүскэллээх эбиппит ээ» диэн өссө хайдах эрэ астына санаатым диэн аһаҕастык этэбин. Кэлии омуктар биллиннэр ээ, манна талбыттарынан дьаабыланаллара сатамматын, эппиэт куруук баар буолуоҕун.
Вера МАКАРОВА, «Саха сирэ» хаһыат, edersaas.ru
Хаартыска уонна видео: News.Ykt.Ru