От ыйын 4 күнүгэр Ил Дархан бирииһигэр ат сүүрдүүтэ ыытыллар буолла!
Бүгүн, бэс ыйын 29 күнүгэр, Саха Өрөспүүбүлүкэтин бэрэсидьиэнэ Айсен Сергеевич Николаев Ил Дархан бирииһигэр ат сүүрдүүтүн ыытыы туһунан кэпсээтэ:
— Быйыл биһиги олохпут барыта тосту уларыйда, коронавирус пандемията биһиэхэ кэлэн олохпут үгүс эйгэтин хааччахтаата. Ол курдук, успуорт эйгэтигэр эмиэ сүрдээх улахан хааччахтар бааллар, биир даҕаны күрэхтэһии ыытыллыбат диэххэ сөп. Кэнники кэмҥэ коронавирус балаһыанньата өрөспүүбүлүкэҕэ намыраан, «ат сүүрдүүтүн ыыттыыга чэпчэтиилэри оҥоруохха сөп эбитэ буолуо дуу»диэн биһиги ырытан көрдүбүт. Ону Суһал ыстаап даҕаны, эпидемия балаһыанньатын кэтиир уорганнар даҕаны, урукку курдук элбэх киһи мустуулаах ат сүүрдүүтүн ыытар сатаммат диэн боболлор.
Ол иһин, быраабыытылыстыба өттүттэн этии киирэн, бу күннэргэ “Ил Дархан бирииһигэр ат сүүрдүүтэ быйыл тохтотуур” диэн сонун тарҕаммыта. Миэхэ тус бэйэбэр ат сүүрдүүтүн ыытар туһунан этиилээх элбэх киһи суруйда — сылгыһыттар, ат сүүрдээччилэр, бу успуорт көрүҥүн сэҥээрэр дьон. Мин бэйэм Ат спордун федерациятын үгүс сылларга салайбытым, ол иһин ат сүүрдүүтүн, сахалар биир саамай таптыыр көрүҥмүтүн хайаан даҕаны өйүөх тустаахпыт диэн санаалаахпын.
Бу күннэргэ элбэх кэпсэтии түмүгүнэн, быһаарыыбыт бу курдук буолла — Ил Дархан бирииһигэр ат сүүрдүүтэ от ыйын 4 күнүгэр Дьокуускайга баар Тыа хаһаайыстыбатын агротехнологическай университетын ипподромугар ыытыллыаҕа.
Ол гынан баран, бу тэрээһин көрөөччүтэ суох ааһыаҕа. «Саха» НКИХ ханаалыгар уонна интэриниэтинэн быһа холбонуулар баар буолуохтара, ол туһунан сөптөөх дьаһаллар бардылар. Ити курдук, ат сүүрдүүтүн таптааччылар быйыл тырыбынаҕа олорон да буолбатар, хааммыт оонньоон, үөрэн-көтөн үчүгэй куоталаһыыны көрүөхпүт диэн эрэллээхпит.
Өрөспүүбүлүкэбит уон бастыҥ соноҕоһо куоталаһыыга бэлэм тураллар. Элбэх киһи бириис кээмэйин туһунан ыйытар. Төһө даҕаны ыарахан буоллар, сылгыһыттарбытын өйүөх тустаахпыт, онон быйыл Ил Дархан бирииһигэр ыытыллар ат сүүрдүүтүн пуондата улаатан, уопсайа 5 мөлүйүөн солкуобай буолла.
Дьоммор-сэргэбэр баҕа санаабын тиэрдиэхпин баҕарабын, от ыйын 4 күнүгэр ох курдук бэлэмнэнэн, үчүгэй настарыанньалаах олорон, ат сүүрдүүтүн көрүҥ! Бастыҥнартан бастыҥнара кыайдын!
edersaas.ru