ХИФУ медицинэҕэ институтун устудьуоннарын хамаандата Казахстан Өрөспүүбүлүкэтин Астана куоратыттан үөрүү көтөллөөх эргилиннэ.
Саха сирин хамаандата клиническэй анатомияҕа уонна суһал хирургияҕа устудьуоннар аан дойдутааҕы олимпиадаларын Гран-притын ылла. Ону сэргэ, устудьуон Алеан Бурнашев сүрэх-тыҥа реанимациятыгар I уонна трахея интубациятыгар II-с миэстэлэннэ.
Олимпиада иннинэ хас биирдии хамаанда бэйэтин регионун билиһиннэрэр видео-ролик ыыппыта. Саха сирин видео-ролигын интэриниэт ситимигэр 12 тыһыынчаттан тахса киһи көрбүтэ.
Хамаандаҕа төрдүс-алтыс куурус 10 устудьуона патологическай анатомия кафедратын ыстаарсай преподавателэ Мария Маркова салалтатынан кытынна. Устудьуоннар сүрэх-тыҥа реанимациятыгар киһи уорганын араас салаатыгар эпэрээссийэлэри оҥорууга үөрүйэхтэрин көрдөрдүлэр, билиилэрин тургуттулар.
Хамаанда салайааччыта Мария Маркова кэскиллээх олимпиадаҕа кыайыыга университет салалтата, үлэһиттэрэ, устудьуоннара, аспираннара бары көмөлөспүттэрин, онон уопсай кыайыы буоларын тоһоҕолоон бэлиэтээтэ.
Мединститут устудьуоннара аан дойдутааҕы олимпиадаҕа кыайыынан эрэ муҥурдамматылар. ХИФУ дэлэгээссийэтэ Астана медицинэҕэ университетын кытары үөрэххэ, научнай-чинчийэр үлэлэргэ, каадырдар таһымнарын үрдэтиигэ бииргэ үлэлииргэ сөбүлэһии түһэристэ.
Надежда ЕГОРОВА, «Саха сирэ» хаһыат, edersaas.ru