Өрөспүүбүлүкэҕэ коронавирус тарҕаныытын утары ыытыллар тэрээһиннэр истэригэр нэһилиэнньэни маҥнайгы ирдэнэр табаар икки ыйдааҕы саппааһынан хааччыйыы үлэтин СӨ бырабыыталыстыбатын бэрэссэдээтэлин солбуйааччы Денис Белозеров тэрийэн ыытар.
Күннэтэ Арктика уонна суола-ииһэ уустуктардаах улуустарга ас-үөл, тутаах табаардар тийиилэрэ, сыаналара хонтуруолланар. Денис Белозеров иһитиннэрэринэн өрөспүүбүлүкэ кууһунан атыылыыр баазаларыгар ас-үөл икки ыйга, социальнай суолталаах табаар 44 хонукка тиийэр саппааһа баар. РФ тыа хаһаайыстыбатын министиэристибэтин уонна өрөспүүбүлүкэ аһы-үөлү таһар тэрилтэлэрин кытта табаары тиэйиигэ үөскүүр күннээҕи кыһалҕа тута быһаарыллан иһэр.
Муус устар 3 күнүнээҕи туругунан Дьокуускай куорат 26 ас-үөл тэрилтэтин ыскылаата нэһилиэнньэни 30 –тан 300 хонукка диэри хааччыйар саппаастаах. Маннык кэтээн көрүү испииһэгэ маҥнайгы ирдэнэр табаар 45 көрүҥүттэн турар. Улуустар бу табаардарынан сүүс бырыһыан хааччыллан олороллор.
Дьокуускай куораттааҕы килиэп астыыр кэмбинээт от ыйыгар диэри бурдугунан, көтөрү иитэр фабрика эмиэ от ыйыгар диэри куурусса аһылыгынан хааччыллыбыттар. Фабрика күннэтэ 141 тыһыынча сымыыты нэһилиэнньэҕэ атыыга таһаарар.
Ньургуйаана Иванова, “Саха сирэ” хаһыат, edersaas.ru
Хаартыска интэриэттэн