Дьиэҕэ хаайтаран олордоххо, киһи аһыыра үксүүр эбит диэн санааҕа элбэх хаһаайка ылларбыт буолуохтаах. Урукку кэмнэргэ дьиэ кэргэн киэһээҥҥи аһылыгар эрэ бииргэ мустан ньиргиччи аһыыр эбит буоллаҕына, билигин уһун күҥҥэ аһыыр остуолтан арахсыбат, ол чахчы. Маннык балаһыанньаҕа ас кыһалҕата сытыытык турар, онуоха бородууктаны эрдэ ылан хаһаана, суоттана үөрэммэтэх ыал хармааныгар охсуулаах буолуон сөп.
Бүгүн биһиги «Ingresso» уонна «Crystal Hall» банкеттыыр саалаларын шеф-поварын Александр Никифоровы кытта аһы хаһааныы уонна минньигэс, иҥэмтэлээх аһылык туһунан ирэ-хоро кэпсэттибит.
— Александр, күммүт-дьылбыт күүппэтэх өттүбүтүттэн эргийэн, аны аһы хаһаанар аакка бардыбыт, онон бүгүҥҥү кэпсэтиибит бу тула барара ылбычча буолбатах. Эн хаһан эмит «хара күҥҥэ» диэн ас хаһааммыттааххын да?
— Үтүө күнүнэн! Үлэбинэн, биллэн турар, ас хаһааһын оҥоро үөрүйэх буоллаҕым, бу эйгэҕэ үлэлээбитим да ыраатта. Улахан тэрилтэни хааччыйар уонна дьиэ кэргэн аһылыгын тэрийэр атыттардаах да буоллар, биир ыал уонча хонук аһыырын хомуйан, сүбэлээн биэриэхпин сөп.
— Чэ, холобур, аныгы дьиэ кэргэн үксэ икки оҕолоох, ол аата, түөрт киһиттэн турар ыал хаһааһыгар төһө элбэх уонна сүрүннээн ханнык бородуукталар баар буолуохтаахтарый?
— Эт, үүт, куруппа, мокоруон, кэнсиэрбэ, килиэп — бу тыын бородуукталар. Манна эбии, кыах баар буоллаҕына, оҕуруот аһын, фрукталары, балыгы эбиниэххэ сөп.
— Ити күннээҕи аһылыкка буоллаҕа, оттон уһуннук хараллар, буорту буолбат тугу хаһаанабыт?
— Элбэҕи уонна уһун кэмҥэ хараллары — куруппаны, саахары, бурдугу ылыахха сөп. Онно эбии туус, маны барытын кураанах сиргэ харайыахха наада. Кэнсиэрбэ туһунан киһи этэ да барбат, улахан сут кэмигэр эти, балыгы кини эрэ солбуйар кыахтаах, дэлэҕэ байыаннайдар уонна геологтар сүрүн астара буолуо дуо…
— Төһө кэмҥэ диэн ааҕынан хаһаанар оруннааҕый?
— Биир ыйга тиийэр ас сөп буолуо дии саныыбын. Үгүс дьон харантыына да суох астарын оннук аттарынан атыылаһалларын билэбин. Киһи наар биири сиэтэҕинэ хал буолар, онон куруппаны элбэх арааһын — мааннай, пшено, перловка, эбиэс, бобовайдартан ылан күн аайы уларытар үчүгэй. Килиэби бэйэ астанар буоллахха бурдугу ботуччу хаһаанар ордук, онно эбии сэлиэһинэй эрэ буолбакка, арааһын ылын, холобур, оруос, гречнебэй, обдирной уо. д. а. Бороһуок үүттэ уонна сгущенката эмиэ хаһааныныахха сөп.
— Эн санааҕар тоҕо дьон гречканы, туалетнай кумааҕыны, чесногу ордук хаһааналларый?
— Мин санаабар, ити дьон ортотугар сылдьар көр-күлүү, ону саайтар, хаһыаттар үлүннэрэн биэрбиттэрин түмүгэ эрэ, оттон чучунааҕы уонна имбиири хайдах буолбут киһи куулунан хаһааныай?
— Түргэнник буһар аһы — «доширагы», хортуоппуй пүрүөлэрин уонна да атыттары хаһаанар наада да?
— Урут үгүспүт солото суох аатыран, дьиэҕэ ас астаммакка түргэнник буһар лапсаларынан, фаст-фудтарынан аһылыктанар этэ. Оттон билигин иллэҥ кэм толору, ол кэми дьиэ кэргэҥҥэ аныыр ордук буолбатах дуо, бииргэ астаан, кэпсэтэн. Оннук ас быдан амтаннаах уонна иҥэмтиэлээх буолар.
— Арай, хотуомкабытын сүгэн тыа, сыһыы диэки көһөргө күһэлиннэхпитинэ (оннук буолбатар ханннык), ханнык бородууктаны ыларбыт ордугуй?
— Итинниги ыраланар соччото суох эрээри, туох буолбатаҕай, күн-түүн балаһыанньа уларыйа турар. Оннук күннэр сатыылаатахтарына, бастатан туран, уу, туус, кэнсиэрбэ, сакалаат уонна хатарыллыбыт фруктаны ылабыт уонна үөһээ ахтыбыт кытай лапсалара дьэ, манна абырыахтарын сөп.
— Дьэ, аны, аспытын туохтан тирэнэн, хайдах ааҕынан ылабыт?
— Хас биирдии ыал тус-туспа сөбүлүүр аһылыктаах буолар, куруутун астыыр киһи билэр, күҥҥэ төһө бородуукта ирдэниллэрин, онон суоттаан таһаарыахха сөп. Оттон эти-сиини бөҕөргөтө диэн эбии эриэхэлэри, фрукталары, уотурбаны хаһааныҥ.
— Александр, “777” минимаркет аһын-үөлүн хайдах сыаналыан этэй?
— Маҕаһыыҥҥа киһи наадыйара барыта баар — сибиэһэй, сыаната да удамыр. Онно эбии сакааһынан дьиэҕэ тиэрдэн биэрии өҥөтө баара олус үчүгэй. Маҕаһыын үлэһиттэрэ сүрдээх айымньылаахтык үлэлииллэрин бэлиэтии көрдүм, атыылаһааччыларыгар анаан араас аахсыйалары, чэпчэтиилэри, оонньуулары тэрийэн ыыталлара — бу бэйэтэ туспа үлэ ээ. Маннык дьону кытта бииргэ үлэлэһэргэ сэргэх буолуо диэн саарбахтаабаппын.
— Улахан махтал. Ыалдьымаҥ, бэйэҕитин уонна чугас дьоҥҥутун харыстааҥ!
НЭДИЭЛЭТЭЭҔИ МЕНЮ
БЭНИДИЭННЬИК
Сарсыардааҥҥы аһылык — изюмнаах эбиэс хааһы
Эбиэт — эттээх мин, оҕурсу салаата
Түөртүүр аһылык — ириистээх рататуй
Киэһээҥҥи аһылык — тэллэйдээх хортуоппуй, редистээх, томаттаах салаат
ОПТУОРУННЬУК
Сарсырдааҥҥы аһылык — цукаталаах кукурууза хааһыта
Эбиэт — горуохтан мин, ириистээх рататуй
Түөртүүр аһылык — банааннаах блины
Киэһээҥҥи аһылык — мокоруоннаах, сүөгэйгэ буспут бысталаммыт эт, хаппыыста салаата
СЭРЭДЭ
Сарсырдааҥҥы аһылык — иэдьэгэй запеканката
Эбиэт — эттээх харчо мин, “битэмииннээх” салаат
Түөртүүр аһылык — хортуоппуйтан лэппиэскэ
Киэһээҥҥи аһылык — ньыһыллыбыт хортуоппуйдаах сүөгэйгэ буспут быар, хаппыыста салаата
ЧЭППИЭР
Сарсырдааҥҥы аһылык — изюмнаах ириис хааһы
Эбиэт — кууруссалаах харчо мин
Түөртүүр аһылык — сүөгэйдээх, эриллибит хортуоппуйтан алаадьы
Киэһээҥҥи аһылык — өҥнөөх хаппыыстаттан кэтилиэт, ириис, күөх салаат
БЭЭТИНСЭ
Сарсырдааҥҥы аһылык — корицалаах эбиэс хааһы
Эбиэт — борщ
Түөртүүр аһылык — дьаабылыкалаах блины
Киэһээҥҥи аһылык — хортуоппуйдаах вареник, редистэн салаат
СУБУОТА
Сарсырдааҥҥы аһылык — изюмнаах иэдьэгэйдээх запеканка
Эбиэт — балыктан солянка мин
Түөртүүр аһылык — блины
Киэһээҥҥи аһылык — эриллибит эттээх, хортуоппуйдаах запеканка, помидортан салаат
БАСКЫҺЫАННЬА
Сарсырдааҥҥы аһылык — сымыыкка буспут килиэп
Эбиэт — кууруссалаах солянка мин, оҕурсулаах салаат
Түөртүүр аһылык — дьаабылыкалаах блины
Киэһээҥҥи аһылык — фольгаҕа буспут балык, “битэмииннээх” салаат
«777» минимаркеттарга маннык нүөмэрдэринэн сайаапка оҥоруоххутун сөп:
8-411-245-00-05 (Ярославского уул.3/1г)
8-411-221-88-18 ( Губина уул.2В)
8-411-221-00-28 (Б. Чижика уул.33Бс1)
Сайт аадырыһа: http://777minimarket.tilda.ws
Батсаап: 7-924-867-79-59
Инстаграм: @777minimarket_ykt
#минимаркет777 #александрникифоров #запасынакарантин