«Сайсары» Бааһынай ырыынагар Саха сирэ Россия састаабыгар киирбитэ 385, Тыа хаһаайыстыбатын уонна ас-үөл бэлиитикэтин министиэристибэтин 95 сылларыгар анаммыт өрөспүүбүлүкэтээҕи ас-үөл быыстапка-дьаарбаҥката бээтинсэттэн саҕалаан буола турар.
Бу үс күн устата «Сайсары» Бааһынай ырыынагар, Хомсомуол болуоссатыгар араас улуустартан, ол иһигэр Өлөөнтөн, Дьааҥыттан саҕалаан, Хатыыстыыры хабан, Тополинайтан тиийэ кэлбит тыа хаһаайыстыбатын табаарын оҥорооччулар бэйэлэрин бородууксуйаларын аҕаланнар атыылыыллар. Быыстапканы көрө-истэ кэлбит дьоҥҥо анаан АПК тэрилтэлэрин үлэһиттэрин уус-уран кэнсиэртэрэ, асчыттар маастар-кылаастара, көрдөөх күрэхтэһиилэр тиһигин быспакка ыытыллаллар. Оттон СГТХА ипподромугар бэҕэһээ, субуотаҕа, тыа хаһаайыстыбатын тиэхиньикэтин уонна племенной сүөһүлэр быыстапкалара тэрилиннэ, бүгүн ат сүүрдүүтэ буолуоҕа.
Оттооһуҥҥа Амма, Кэбээйи бастаатылар
Быыстапка-дьаарбаҥка аһыллыытыгар оттооһуҥҥа күрэхтэһии түмүгэ таһаарылынна. Маҥнайгы зонаҕа былаанын 107 % толорон Амма улууһа (баһылык Николай Архипов) бастаата, иккис миэстэни сорудаҕын 105 % толорбут Таатта (баһылык Михаил Соров) ылла, үһүс миэстэ кимиэхэ да бэриллибэтэ. Иккис зонаҕа былаанын 111 % толорбут Кэбээйи улууһа (Игнатий Спиридонов) бастаата, иккис миэстэни былаанын 107 % толорбут Сунтаар улууһа (баһылык Анатолий Григорьев), үсүһү кыстыыр отун 103 % хааччыммыт Ньурба улууһа (баһылык Андрей Иннокентьев) ыллылар. Бастаабыттар «УАЗ-охотник» массыынанан, иккис миэстэни ылбыттар «Сынтай- 220» тыраахтарынан наҕараадаланнылар, бириистээх үһүскэ тиксибит улууска компьютер бэрилиннэ.
Бастаабыт Кэбээйи улууһун баһылыга Игнатий Спиридонов
Министиэристибэҕэ – чиэстээһин, Хатаска – аллея
Ааспыт сылларга таһаарыылаахтык үлэлээбит-хамсаабыт аҕа көлүөнэ бастыҥ бэрэстэбиитэллэрэ умнуллубаттар. Бээтинсэ сарсыарда Тыа хаһаайыстыбатын уонна ас-үөл бэлиитикэтин министиэристибэтин аактабай саалатыгар биллиилээх хаһаайыстыбанньык Семен Жиркову 95 сааһын туолбутунан чиэстээһин тэрилиннэ. Хатаска өр сылларга «Хатас» сопхуоһу салайбыт, хатастар «Ийэбит» диэн ытыктаан ааттыыр киһилэрэ, Парасковья Федорова, 90 сааһын туолбутунан Үлэ Албан аатын аллеята арылынна. Аллеяны нэһилиэк тэрилтэлэрин кэлэктииптэрэ оҥорбуттар, анаммыт учаастактарын ыраастаан, күрүөлээн, кырааскалаан кэбиспиттэр итиэннэ бэйэлэрин баннердарын туруорбуттар. Аллеяны арыйыы миитинигэр нэһилиэк олохтоохторо ытык киһилэрин үрдүк аатыгар сүгүрүйэн туран, бу тэрээһини быыстапка-дьаарбаҥка былааныгар киллэрэн туран, хас да киһилээх дэлэгээссийэнэн кэлбит тыа хаһаайыстыбатын уонна ас-үөл бэлиитикэтин миниистирин солбуйааччы Николай Петровка махтаннылар. Парасковья Павловна 90 сааһыгар сөп түбэһиннэрэн, 90 маһы олортулар.
Үлэ Албан аатын аллеята
Бүгүн быыстапка-дьаарбаҥка үс күннээх үлэтин түмүгэ таһаарыллыаҕа. Үгэс курдук, көрүҥнэринэн ханнык хаһаайыстыбалар бастаабыттара биллиэҕэ, төһө киһи кыттыбыта, төһө суумалаах ас-үөл батарыллыбыта барыта быһаарыллыаҕа.
Раиса Сибирякова, “Саха сирэ” хаһыат, edersaas.ru
Быыстапка-дьаарбаҥка түгэннэриттэн
Ас-үөл арааһын ааҕан сиппэккин
Чурапчылар мэлдьи тэрээһиннээхтэр
Боруода сүөһүнү көрөр хамыыһыйа кытаанах
Оҕо-аймах да элбэх
Раиса Сибирякова, «Саха сирэ» хаһыат, edersaas.ru