«Сыа Бүлүү» тыа хаһаайыстыбатын кэпэрэтиибэ 2009 сылтан Бүлүү улууһун тыатын хаһаайыстыбатын бородууксуйатын астаан таһаарар биир ааттаах-суоллаах бөдөҥ кэпэрэтиибинэн буолар.
Манна 21 тыа хаһаайыстыбатын потребительскай кэпэрэтиибэ, 20 бааһынай хаһаайыстыба, 14 урбаанньыт уонна икки хааччахтаммыт эппиэтинэстээх уопсастыба түмсэн, сүөһүлэрин этин-үүтүн туттаран, астатан таһаараллар.
Тэрилтэ үүт собуоттаах, 6 арыы уонна ыраас уу, отонтон утах, барыанньа оҥорон таһаарар сыахтардаах. Бүлүү куоратыгар фирменнэй маҕаһыыннардаах.
«Сыа Бүлүү» ТХПК дириэктэрэ Алексей Кондратьев Ил Дархан Айсен Николаев тыа сирин үс сылга сайыннарыыга туһуламмыт кэскиллээх хайысханы өйөөбүтүн туһунан санаатын бу курдук үллэһиннэ:
— Бу этиллибит үлэ хайысхатын түмүгэ нэһилиэнньэ остуолугар тиийэр астан-үөлтэн биллиэҕэ. Болҕомто сүрүннээн хотону, сиэмэ ыскылаатын, сылгы баазатын тутууга уурулунна. Бу сүөһү ахсаанын элбэтиигэ тус сыаллаах үлэ буолан, дириҥ ис хоһоонноох. Маны кытта биир сибээстээх хайысханы — аһы-үөлү переработкалааһыҥҥа үбү тыырыы эмиэ чопчу этиллибитэ буоллар, бу салаа сайдыыта иннин диэки хардыылыа этэ. Кэтэх ыаллар үүт туттарбакка, үүт аһын оҥорон таһаарыыга кээмэйбит икки төгүл кыччаата. Ол иһин атыыга арыы кэмчи буолла. Эккэ субсидия көрүллүбэккэ, сыаната үрдүгүн көрө сылдьабыт. Аны идэһэлээһиҥҥэ уларыйыы бөҕөтө киирдэ. Билигин «убойнай» эрэ сыах нөҥүө ааспыт эт атыыга барар. Онон биһиги тэрилтэбит курдук бу ирдэбиллэргэ эппиэттиир сыахтардаах бөдөҥ переработкалыыр тэрилтэлэри сайыннарыыга туох өйөбүл оҥоһуллара чопчу ыйыллыбыта буоллар, тус сыалынан көмөнөн туһанныбыт диэхпит этэ. Бу боппуруоһу тыа хаһаайыстыбатын министиэристибэтэ сиһилии быһааран биэрэрэ буоллар диэн санаалаахпын.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Василий Кононов түһэриитэ.