Арктика оройуоннарыгар 2022 сыл бүтүөр диэри тиийэр ас-үөл баар. Бу туһунан Дьокуускайга Якутопторг баазатыгар сылдьан баран, СӨ Бырабыыталыстыбатын Бэрэссэдээтэлэ Андрей Тарасенко иһитиннэрдэ. Ол курдук, Якутопторг улуустарга филиалларыгар тиэрдиллиэхтээх ас-үөл саппааһа баар, бу Арктикаҕа эргиэн-логистика кииннэрин киллэрэн туран.
—Ил Дархан Айсен Николаев ас-үөл саппааһын сыл инниттэн хааччыйарга сорудахтаабыта. Якутопторг күүһүнэн, сөп буолар наадалаах аһы-үөлү Арктика уонна уустук суоллаах-иистээх оройуоннарга тиэрдэргэ соруйбута, ол инниттэн тэрилтэҕэ 208 мөл.солк.суумалаах субсидия бэриллибитэ, — диэн бэлиэтиир Андрей Тарасенко. Ас-үөл саппааһын Арктическай уонна уустук суоллаах-иистээх оройуоннарга диэри сайын уу суолунан тиэрдиллиэ, атыыга тахсарыгар сыаната Дьокуускай киэниттэн үрдүө суоҕа диэн этиллэр.
Бүгүҥҥү күҥҥэ 3 185 туонна астан-үөлтэн 3 184 туонната тиэллибит. Ити былаантан 100% кэриҥэ. Уу суола аһыллыар диэри өрөспүүбүлүкэ саппааһа барыта баар буолуоҕа. Манна бурдугу, саахары, оҕуруот аһын, фруктаны киллэрэн туран. Санатар буоллахха, 5000 туонна аһы-үөлү хаһаанар улахан баазаҕа кууһунан тарҕатар, үллэрэр киин быйыл олунньуга аһыллыбыта. Манна хортуоппуйу хаһаанар сир баар, ону сэргэ, оҕуруот аһын, фруктаны, түргэнник буорту буолар аһы уурар анал камералар эмиэ бааллар. Дьокуускай олохтоохторо мантан кууһунан, биирдиилээн атыылаһар кыахтаахтар. Бэлиэтиир буоллахха, баазаҕа тупсаран, уларытан оҥоруу, саҥардан биэрии үлэлэрэ 2020 сылтан түһүмэхтэринэн саҕаламмыттара. Арктика оройуоннарыгар атыы-эргиэн логистика кииннэрэ арыллаллар. Ол курдук, кииннэр былырыын Абый уонна Усуйаана оройуоннарыгар аһыллыбыттара. 2022 сылга Дьааҥыга, Орто Халымаҕа, Эдьигээҥҥэ, Аллараа Халымаҕа былааннаналлар. Онтон 2025 сылга диэри эргиэн-логистика кииннэрэ Арктика 13 оройуонугар баар буолуохтаахтарын туһунан этиллэн турар.
СӨ Ил Дарханын уонна СӨ Бырабыыталыстыбатын пресс-сулууспатын хаартыската
+1
+1
+1
+1
+1
+1
+1