Дьиэҕэ хаайтаран олоруу эрэсиимэ киирбитинэн, аҕам саастаах дьоҥҥо көмө оҥороллоро, болҕомтолорун уураллара хайҕаллаах.
Сунтаар улууһун Арыылаах нэһилиэгиттэн төрүттээх, Дьокуускайга олорор дьон кыттыһан, тыыл бэтэрээннэригэр, сэрии сылларын оҕолоругар истиҥ тыллардаах аккырыыкканы, аалай гвоздика дьөрбөтүн сэргэ, бородуукта нобуорун атыылаһан, тиэрдэн биэрдилэр.
Түмсүү салайааччыта Леонид Пахомов:
— Куоракка оҕолоругар кэлэн, дьиэҕэ олорор аҕам саастаах биир дойдулаахтарбыт олус үөрдүлэр, махтаннылар. Ордук “болҕомтоҕут иһин махтанабыт” диэн этэллэр, тоҕо диэтэр, дойдуларыттан ыраах тэлэһийэн олорон, умнубатахтар диэн үөрэллэр. Кылгастык да буоллар, кэпсэтэн, сонун истэн сэргэхсийдилэр, сүргэлэрэ көтөҕүлүннэ. Мааскалаах, бэрчээккилээх, бары харыстанар ньымалары тутуһан сырыттыбыт. Сорохторго ыраахтан туран, оҕолоругар биэрдибит, — диэн кэпсээтэ.
Улуу Кыайыы күнүн бэлиэтииргэ көлүөнэлэр алтыһыылара, сэрии муҥун-эрэйин эттэринэн-хааннарынан билбит, күүстэрин харыстаммакка үлэлээбит кырдьаҕас көлүөнэ дьон ыллыктаах тылларын-өстөрүн, тыыннаах кэпсээннэрин тиэрдии ордук суолталаах. Быйылгы уустук балаһыанньаҕа хас нэһилиэк, тэрилтэ, түмсүү аайы киһилии сыһыан, истиҥ тыл, болҕомто аҕам саастаах дьоммутугар туһаайыллыбыта үөрүүлээх.
Невропатолог быраас Ольга Лазаревна Иванова ийэтэ кэһиини хайдах туппутун туһунан хоһоон суруйда.
Ийэкэм хараҕа ууланна…
«Арыылаах» Түмэр Сүбэ
Кэллэ күндү кэһиитэ,
Кыайыы күнүн үөрүүтэ
Икки төгүл үрдээтэ!
Тоҕус уон кыһынын аһарбыт,
Сэрии сылларын туораабыт
Ийэкэм сирэйэ сырдаата,
Өлбөөрбүт хараҕа уоттанна.
Санаата төрөөбүт түөлбэтин,
Тыһакыыс нэлэмэн хонуутун,
Оҕо саас сиэдэрэй сылларын,
Уһун Күөл аҕыйах дьиэлэрин.
Куоракка олорор дьонугар,
Эдьиийин Катя оҕолоругар,
Агашаҕа — күндү балтыгар,
Бары биир дойдулаахтарыгар,
Кыракый болҕомто ууруллан,
Ветеран махтала улахан!
Кэһиини ылан имэрийэр,
Үөрбүт хараҕа ууланар…
Ангелина Васильева, “Саха сирэ” хаһыат, edersaas.ru