Муус устар 12 күнүгэр Дьокуускайга Орджоникидзе болуоссатыгар СӨ Фермер хаһаайыстыбаларын уонна тыа хаһаайыстыбатын кэпэрэтииптэрин ассоциацияларын пуорумун чэрчитинэн, тыа хаһаайыстыбатын оҥорон таһаарааччыларын дьаарбаҥкалара буола турар. Манна көрдөххө, аҕыйах хаһаайыстыба кэлэн, бородууксуйатын атыылыыр.
Ол курдук, Таатта, Чурапчы, Нам, Мэҥэ Хаҥалас тыа хаһаайыстыбатын кэпэрэтииптэрэ, “Малый базар” резиденнэрэ бааллар. Сыаналара, Дьокуускай баар олохтоох бородууксуйаны атыылыыр маҕаһыыннар сыаналарыттан чэпчэкитэ суохтар. Холобур, “Малый базар” ырыынакка эмиэ маннык олохтоох бородууксуйа атыыланар.
Ол үрдүнэн, Чурапчы, Таатта кэпэрэтииптэригэр сарсыардаттан уһун уочарат субулунна. Тоҕо диэтэр, манна ынах арыытын 750-800 солкуобайга атыылаатылар. Арыы ылаары турар киһи элбэх. Онон, барыларыгар тиксимээри гынан, биир киһиэхэ биирдии киилэ эрэ арыыны атыылыы тураллар.
Ынах этэ – 500-700 солкуобай, иһэ – 350-450 солкуобай, хаана – 550 солкуобай, убаһа хаана – 1350-1500 солкуобай, чөчөгөй – 250-300 солкуобай, үүт – 99-120 солкуобай, суорат – 96-110 солкуобай, моонньоҕон барыанньата – 650 солкуобай, о.д.а. сыаналаахтар.
Маны тэҥэ, чааһынай дьон кытыан угун, сылгы сиэлин, моонньоҕон сэбирдэҕин, тэтиҥ хатырыгын, тэтиҥинэн массаастанар мас оҥорон эмиэ атыылыы тураллар.
Дьон олохтоох аһы-үөлү хамаҕатык атыылаһар, хаһаанар. Онон бэйэбит төрүт аспытын-үөлбүтүн дэлэтэн, олохтоох оҥорон таһаарыыга хаһааҥҥытааҕар да болҕомто ууран, сайдарыгар олук ууруоҕуҥ.
Ангелина Васильева, “Саха сирэ” хаһыат, edersaas.ru
Хаартыска: ааптар түһэриилэрэ.