Арыйаан Тютриҥҥа 400 тыһыынча солкуобайдаах сэртипикээт туттарылынна
Арыйаан Тютриҥҥа Саха сирин салалтатыттан 400 000 солк.суумалаах сэртипикээт туттарылынна.
Бүгүн, алтынньы 12 күнүгэр, СӨ вице-премьерэ Сергей Местников Норвегияҕа ыытыллыбыт көҥүл тустууга аан дойду чөмпүйэнээтигэр боруонса мэтээли ылары ситиспит Арыйаан Тютрины көрүстэ. Сергей Местников спортсмены истиҥник эҕэрдэлээтэ, Арыйаан аан дойду түһүлгэтигэр дьоһуннук кыттыбыта Саха сирин дьонун-сэргэтин улахан киэн туттуута буоларын бэлиэтээтэ.
«Саха дьоно-сэргэтэ көҥүл тустууну олус таптыыллар. Хапсыһыыны умсугуйан кэтиибит-маныыбыт, тустууктарбытыгар ис сүрэхпититтэн ыалдьабыт. Успуорт бу көрүҥүнэн элбэх саха ыччата кыра оҕо саастарыттан сөбүлээн дьарыктаналлар. Онон аан дойду чөмпүйэтээтигэр Арыйаан ситиһиитэ барыбытыгар улахан үөрүү», — диэн этэр вице-премьер.
Арыйаан чөмпүйэнээккэ кыттарга сүүмэрдээһин, утарсааччылары кытта хапсыһыы чаҕылхай түгэннэрин туһунан кэпсээтэ. Кини өр дьаныардаах бэлэмнэнии, тириэньэри кытта бииргэ үлэлээһин маннык түмүккэ аҕалбытын бэлиэтээтэ.
СӨ үтүөлээх тириэньэрэ Иван Дмитриев Арыйааны 13 сыл устата тиһиктээхтик дьарыктыыр. Спортсмен бу сыллар усталарыгар араас күрэхтэһиилэргэ ситиһиилээхтик кыттыбыт.
Арыйаан Тютрин — Арассыыйа чөмпүйэнээтин үс төгүллээх боруонса призера, Аан дойду кубогын хаһаайына, Арассыыйа сүүмэрдэммит хамаандатыгар киирэн норуоттар икки ардыларынааҕы турнирдар кыайыылаахтарынан, призердарынан буолбута. Быйылгыттан тустуук Белоруссия хамаандатыгар кыттар, Белоруссияҕа көҥүл тустууга чөмпүйэнээккэ кыһыл көмүс мэтээли ылбыта.
Тириэньэр Арыйаан Тютрины, аны, 2024 сылга Парижка буолар Олимпийскай оонньууларга кыттарга сыал-сорук туруорунан бэлэмнэниэн наада диэн тоһоҕолоото.
Спортсмен уонна тириэньэр Өрөспүүбүлүкэ уонна Уус Алдан улууһун салалталарыгар куруук өйүүллэрин иһин махтаннылар.
СӨ Физкултуураҕа уонна успуорка миниистирин бастакы солбуйааччы Леонид Спиридонов Арыйаан Тютрин ситиһиитэ Саха сирин тустууктара 1976 сыллаахха Монреалга олипиадаҕа кыайыыларын 45 сылын туолуутун кытта сөп түбэспитин эттэ. Итиэннэ Саха сирин дьоно-чэргэтэ олимпиадаҕа эрэли Арыйаан Тютрины кытта ыкса туталларын, сибээстииллэрин иһитиннэрдэ.
Сергей Местников Саха Өрөспүүбүлүкэтин салалтатын аатыттан Арыйаан Тютриҥҥа 400 000 солк. суумалаах, тириэньэригэр Иван Дмитриевка 200 000 солк. суумалаах сэртипикээттэри туттарда.
Хаартыскаларга Мария Васильева (СИА) түһэриилэрэ.
+1
+1
+1
+1
+1
+1
+1