Бу ыйтан “Арыгыта суох сыбаайба сүпсүлгэнэ” диэн аан бастаан ыытыллар бырайыак саҕаланна. Бу бырайыагы СӨ Арыгы атыытын хонтуруоллааһыҥҥа, лицензиялааһыҥҥа управлениета, “Трезвая Якутия” хамсааһын, ЗАГС управлениета кыттыһан тэрийэллэр.
Манна сокуонунан холбоһо илик, таптаһар пааралар кыттыахтарын сөп. Бастаан бэйэлэрин, хайдах билсиспиттэрин, сылдьыбыттарын туһунан суруйан ыыталлар. Кинилэртэн 25 паараны талан ылан, чөл олоҕу тутуһалларын туһунан видео устарга сорудахтыыллар. Ол кэнниттэн уопсай куоластааһын түмүгүнэн 10 паараны талан, финалга таһаараллар.
Финал кулун тутар 21 күнүгэр Дьокуускайга ЗАГС дьиэтигэр буолуо. Финалистар бары сыаналаах бирииһинэн наҕараадаланаллар. Оттон кыайыылаах паараҕа босхо сыбаайба тэрийэн биэриэхтэрэ. Усулуобуйата – сыбаайба арыгыта суох ыытыллыахтаах.
Генеральнай спонсор “Ренабо” гостиница комплекса 50 киһилээх банкет тэрийэр уонна биир күҥҥэ хонор нүөмэр бэлэмниир. Grace кэрэ сэбэрэ салона кийиити кырааскалаан, бүрүчүөскэтин оҥорон биэрэр. Yes сыбаайба агентствота, Оксана Жиркова салайааччылаах тамадалар бөлөхтөрө дьоро киэһэни иилээн-саҕалаан ыытыахтара. Видеограф Дмитрий Ляшеев видеоҕа түһэрэн дьоллоох түгэннэри үйэтитиэҕэ.
Оксана Жиркова, тамада:
—Былырыын Чурапчыга 9 тамада түмсэн, арыгыта суох сыбаайбаны ыытан турабыт. Ыалдьыттар сампааннаах бакаалы көтөҕөр оннугар биэ үүтүттэн оҥоһуллубут кыынньар кымыһынан айах туппуттара. Ким да арыгы суох диэн чуҥкуйан олорботоҕо, ырыа, үҥкүү, оонньуу элбэх этэ. Бары үөрэн-көтөн, күлэн-оонньоон дуоһуйа сынньаммыттара, бүтүөр диэри сылдьыбыттара. Арыгыта да суох үөрүөххэ-көтүөххэ сөп, мин ону элбэхтик кэтээн көрбүтүм.
Мин 20-тэн тахса сыл тамадалаабыт киһи, саҥа ыал буолар эдэрдэр дьылҕаларын түстүүр дьоро киэһэлэрин арыгыга тирэҕирбэккэ, үтүө сиэрдээх өбүгэ үгэһин тутуһан, саҥа олохторун саҕалыахтаахтар дии саныыбын. Кинилэр холуочук дьон эҕэрдэтин буолбакка, ис сүрэхтэн тахсар истиҥ тыллары истибиттэрэ быдан ордук.
Таптаһар паараларга айымньылаахтык сыһыаннаһаргытыгар, бэйэҕитигэр эрэллээх буоларгытыгар, нарын тапталгытын харыстыыргытыгар баҕарабын.
Ангелина Васильева, “Саха сирэ” хаһыат, edersaas.ru