Дьокуускай куоракка кулун тутар 22-28 күннэригэр чөл олоҕу тутуһааччылар, арыгыны утарааччылар форумнара төрдүс төгүлүн ыытыллар. Форуму СӨ Арыгыны хонтуруоллуур судаарыстыбаннай кэмитиэт управлениета, ыччат дьыалаларыгар, дьиэ кэргэн бэлиитикэтигэр министиэристибэ, «Якутия против алкоголизма» уонна «Трезвая Якутия» уопсастыбаннай хамсааһыннар тэрийэн ыыталлар.
Ангелина Васильева, “Саха сирэ” хаһыат, edersaas.ru
Форум учууталлары, иитээччилэри, социальнай үлэһиттэри, төрөппүттэри үөрэтииттэн саҕаланыа. Чопчулаан эттэххэ, улаатан эрэр оҕолор психоактивнай бэссэстибэлэри туһаналларын хайдах тохтотор туһунан Татарстантан кэлбит Владимир Фахреев лиэксийэ ааҕыаҕа. Кини психоаналитиктар аан дойдутааҕы ассоциацияларын чилиэнэ, «Благотворительный реабилитационный центр им. Талгата Шайхуллина» уонна «Трезвый Альметьевск» уопсастыбаннай түмсүүлэр салайааччылара, социальнай педагог.
Кулун тутар 26 күнүгэр оскуола үөрэнээччилэригэр уонна устудьуоннарга чөл олоҕу тутуһааччылар, арыгыны утарааччылар оскуолалара үлэлиэ. Оҕолор социальнай бырайыактары оҥорон көмүскүөхтэрэ.
Сарсыныгар коммерческайа суох тэрилтэлэр, муниципальнай тэриллиилэр исписэлиистэригэр уонна салайааччыларыгар анаммыт дьыалабыай оонньуу ыытыллыа. Оонньууну бизнес-консультант, Ломоносов аатынан МГУ экспердэ, «Технология решений» консалтинговай бөлөх салайааччыта, «В защиту жизни» уопсастыбаннай тэрилтэ салайааччыта Наталья Неделько салайан ыытыаҕа.
Кулун тутар 28 күнүгэр “Арыгыны иһиини аҕыйатыы – нэһилиэнньэ олоҕун хаачыстыбатын үрдэтии мэктиэтэ” диэн тиэмэҕэ дьүүллэһии, ырытыһыы буолуоҕа. Сокуоннар хайдах дьайалларын, арыгы атыытын хайдах аҕыйатар туһунан, о.д.а. саҥа бырайыактары дьүүллэһиэхтэрэ.
Форум “төгүрүк остуолунан” түмүктэниэҕэ. Манна доруобуйа уруоктарын үөрэх бырагырааматыгар киллэрии туһунан кэпсэтии барыа.
Ангелина Васильева, “Саха сирэ” хаһыат, edersaas.ru