Арыгылааһынтан эмтэниэн баҕалаахтарга ким көмөлөстө?

Бөлөххө киир:

Атырдьах ыйын 4 күнүгэр Дьокуускайга  “Дьиэҕэ тириэрдэр суол” (“Путь к дому”) аахсыйа 10 төгүлүн ыытылынна.

Олорор сирэ-уота суох дьоҥҥо туһуламмыт көмөнү оҥорор сыаллаах-соруктаах, 2018 cылтан ыытыллар социальнай бырайыакка полицейскайдар, эмчиттэр уонна социальнай сулууспалар кытталлар.

Быйылгы аахсыйа, үгэс курдук, Федор Попов аатынан уулуссаҕа “Хоттей” кафе таһыгар тэрилиннэ. Манна кэлбит дьоҥҥо сылаас аһылыгы түҥэттилэр, доруобуйаны чөлүгэр түһэрэр тэрилтэлэргэ киириэн, докумуоннарын оҥорторуон баҕалаахтары уо.д.а. быһаардылар. Кинилэри фтизиатр, терапевт быраастар көрдүлэр, хаан анаалыһын ыллылар, флюорографияҕа түһэрдилэр уо.д.а. Онтон баҕалаахтары кытары  Наркология өрөспүүбүлүкэтээҕи диспансерын биир улахан уопуттаах, аптарытыаттаах  нарколога Надежда Хоютанова истиҥник, аһаҕастык кэпсэтэн, көнө суолга турунарга сүбэ-ама биэрдэ. Ол түмүгэр  60 киһини кытары кэпсэтииттэн 9 эрэ киһи наркология диспансерыгар эмтэниэн баҕарарын туһунан биллэрдэ.

Психиатр-нарколог Надежда Хоютанова ол төрүөтүн маннык быһаарда:

— Кинилэр  олох үөрүүтүн-көтүүтүн арыгыга уонна наркотикка атастаспыт дьон туругар сылдьаллар. Арыгылааһын – дууһа эрэ буолбакка, эт-сиин ыарыыта. Кинилэр  бэйэлэрин туруктарыгар кириитичэскэй сыһыаннарын,  саат-суут, суобас курдук майгы-сигили өрүттэрин сүтэрэллэр, толоостук эттэххэ, толкуйдаабат да буолаллар… Ол туохха тириэрдэрэ олус хомолтолоох – араас ыарыы, үлэтэ суох буолуу, социальнай хантаагы барытын сүтэрии, уулуссаны кээмэйдээһин уо.д.а.

Үлэбэр үөрүйэхпиттэн үллэһиннэхпинэ, дьон уларыйар, бэл, эн ону эрэ күүппэтэх киһиҥ эмиэ уларыйыан сөп. Биһиги кими эмэ быыһыыр эрэлбитин хаһан да сүтэрбэппит. Саҥа олоҕунан олорор кыах куруук баар! Сүрүнэ – икки өттүттэн сөбүлэһэн, инникигэ хардыыны оҥоруохха.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0