Дьокуускайга арыгыны атыылыыр маҕаһыыннар ахсааннара аҕыйыа диэн киин куорат аҕа баһылыга Евгений Григорьев иһитиннэрдэ.
Бу иннинэ арыгыны атыылыыр маҕаһыыннартан социальнай эбийиэктэр тэйиччи турар ирдэбиллэрин улаатыннарбыттара. Ол курдук, арыгы маҕаһыыннара оскуолалартан 300 миэтэрэ, уһуйааннартан, спортивнай, култуурунай, доруобуйа харыстабылын эбийиэктэриттэн 200 миэтэрэ, олорор дьиэлэртэн 50 миэтэрэ тэйиччи туруохтаахтар. Бу урукку ирдэбиллээҕэр 100-түү миэтэрэнэн эбиллэн биэрбитэ.
— Быйыл социальнай эбийиэктэр чугастарыгар уонна элбэх кыбартыыралаах олорор дьиэлэргэ арыгы атыыланыа суохтаах диэн уураах ылыммыппыт. Оттон арыгыны, пиибэни кутан атыылыыр тэрилтэлэр лицензията суох үлэлииллэр, онон сабыллыахтара. Куорат олохтоохторо бу маннык үлэлиир тэрилтэлэр тустарынан социальнай ситимнэргэ да, административнай хамыыһыйаҕа да иһитиннэриэхтэрин сөп. Бары бииргэ арыгыны утары охсуһуоҕуҥ, — диэн Евгений Григорьев эттэ.
Ангелина Васильева, “Саха сирэ” хаһыат, edersaas.ru
Хаартыска: moskvichmag.ru.