Үтүө күнүнэн ааҕааччым!
CӨ Арыгы ырыынагын сүрүннүүр судаарыстыбаннай управлениета уонна СӨ Бырабыыталыстыбатын иһинэн Гражданнар туруктарын аактатын суруйар управление (ЗАГС) бу ыйга «Чөл олохтоох дьиэ кэргэн» диэн куонкурус ыыттылар. Куонкурус сүрүн сыала-соруга — чөл олоҕу тарҕатыы. Куонкуруска хаһан да уруу бырааһынньыгын тэриммэтэх уонна арыгыта суох урууну тэрийиэн баҕарар ыаллар уонна холбоһо илик пааралар кыттыыны ыллылар.
Куонкуруска Мэҥэ Хаҥаластан, Сунтаартан, Бүлүүттэн, Дьокуускай уонна Екатеринбургтан сайаапкалар киирбиттэрэ. Олортон биэс ыал финалга кыттар чиэскэ тигистэ: Мэҥэ Хаҥаластан Дьулустаан Сысолятин уонна Туяра Игнатьева, Сунтаартан Александр Уаров уонна Надежда Тихонова, Дьокуускайтан Владимир Сластион уонна ЛюдмилаГригорьева, Андрей Лизнёв уонна Марина Селецкая, Екатеринбургтан Айаал Брызгалов уонна Сайыына Аржакова. Кыттааччылар бары даҕаны дьоҥҥо холобур буолар, чөл олоҕу тутуһар эрэ буолбакка, тарҕатар эбиттэр.
Билигин үгүс уруу бырааһынньыктарын аһыы утаҕа суох тэрийэр буолбуттар. Ааспыт ыйга Намҥа Анна уонна Дмитрий Никитиннар дьиэ кэргэннэрэ урууларын арыгыта суох тэрийбиттэр:
“Саха ыала буоларбыт быһыытынан, уруубут киэһэтин сахалыы тыыннаах тэрийэргэ дьоммутун кытта биир сүбэҕэ киирбиппит. Уруубутун бу сыл олунньу ыйыгар Нам улууһун Бөтүҥ нэһилиэгэр оҥорбуппут. Өбүгэлэрбит үгэстэринэн, кымыстаах, быырпахтаах чорооннору көтөхтөрбүппүт. Биһиги дьиэ кэргэн аһыы утаҕы утарабыт. Бэйэбит түөрт уол оҕолоохпут. Оҕолорбутугар, Сахабыт сирин олохтоохторугар үтүө холобуру көрдөрөөрү, бэйэбит омукпут үгэстэрин өрө тутаары уонна кэлэр кэнэҕэски ыччаттарбытыгар холобур буоллун диэн, маннык урууну тэрийбиппит”, — дииллэр.
Бу ыаллар курдук урууларгытын арыгыта суох, чөллүк тэриниҥ! Инникитин арыгыта суох уруулар үгэс буолуохтара диэн эрэнэбин. Чөл буолуҥ!
Матвей Лыткин, СӨ Арыгы атыытын сүрүннүүр управлениетын салайааччы, edersaas.ru сайтка анаан