Арыгы атыылыыр «туочука» хаһаайкатыгар холуобунай дьыала тэрилиннэ
Билэргит курдук, бутлегердар диэн арыгыны кистээн атыылыыр дьону ааттыыллар. Нэһилиэктэргэ оннук «туочукалар» бааллар. Биир оннук «туочука» хаһаайкатыгар холуобунай дьыала тэрилиннэ.
Сунтаар улууһун биир сэлиэнньэтигэр участковай боломуочунайдарга иһитиннэрии киирбит. Биир дьахтар арыгы уоран атыылыырын тохтоппотоҕун туһунан. Дьиҥэр, бу 55 саастаах бутлегерша РФ Административнай кодексатын 14.17.1 ыстатыйатынан эппиэккэ тардылла, ыстарааптана сылдьыбыт эбит.
Ол эрэн, онтон кини кэһэлтэ буолбатах, сөптөөх түмүгү оҥостубатах уонна арыгытын атыылыырын курдук салгыы атыылыы олорбут — дьиэтигэр бородуукта маҕаһыынын арыйан, итирдэр утахтары атыылыыр бырааба суох эрээри, биир бытыылканы 700 солк. сыанаҕа биэрэр эбит.
Бу чахчынан РФ Холуобунай кодексатын 171.4-с ыстатыйатынан («Арыгылаах бородууксуйаны сокуоннайа суохтук атыылааһын») дьыала тэриллибит. Бу ыстатыйанан көрүллэр накаастабыл миэрэ — 50-тэн 80 тыһ. солк. диэри суумалаах ыстараап биитэр биир сылга диэри болдьоххо көннөрүнэр үлэҕэ ууруу.
Омос көрдөххө, маннык сокуону кэһии улахан буруйга киирсибэт курдук эрээри, содула бэрдэ суох — холуобунай эппиэтинэскэ тардыллыбыт киһи чугас аймахтара судаарыстыбаннай сулууспаҕа, быраабы араҥаччылыыр уорганнарга үлэлии, анал үрдүк үөрэх кыһаларыгар үөрэнэ киирэр кыахтара суох буолар.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн