Саха сирин артыыстара «Бансу» байыаннай драмаҕа уһуллаллар.
«Бансу» — детектив, сэрии, үспүйүөннэр, эмиэ да кутталлаах дьикти күтүр баар…
Киинэ режиссера Павел Костомаров, «Чернобыль. Зона отчуждения», «Эпидемия», о.д.а. сериалларынан киэҥник биллэр.
Үөрүүлээҕэ, Арассыыйа биллиилээх артыыстарын кытары бу киинэҕэ Саха сирин артыыстара: Былатыан Ойуунускай аатынан Саха академическай драматическай тыйаатырын артыыһа, РФ үтүөлээх артыыһа, СӨ норуодунай артыыһа Герасим Васильев, С.А.Зверев-Кыыл Уолун аатынан национальнай үҥкүү тыйаатырын артыыһа, РФ үтүөлээх артыыһа, СӨ норуодунай артыыһа Дмитрий Артемьев уонна Үүнэр көлүөнэ тыйаатырын артыыһа, СӨ Култууратын туйгуна Георгий Бессонов оонньууллар.
Кинилэри кытта «Ника»бириэмийэ лауреата, биллиилээх актер Тимофей Трибунцев, 2015 сыллаахха «Кинотавр» киинэ бэстибээлигэр «Эр киһи бастыҥ оруола» лауреатынан буолбут Александр Паль оонньууллар. Великобритания, Германия артыыстара кытталлар.
Манна даҕатан эттэххэ, саха дьоно-сэргэтэ киэн туттар, сүгүрүйэр артыыспыт Герасим Васильев «Тайна Чингис Хаана» (режиссер А. Борисов), «Волк» (режиссер Никола Ванье, Франция), «Территория» (режиссер А. Мельник) о.д.а. киинэлэргэ оонньообута. Оттон Үүнэр көлүөнэ тыйаатырын артыыһа Георгий Бессонов эдэр ыччат сөбүлээн көрөр киинэлэригэр, «Республика Z», «Уол оҕото», «Атын олох», о.д.а. киинэлэргэ уһуллубута.
Артыыстар Артыбашка туристическай баазаҕа олороллор. Киинэҕэ уһуллаары хас сарсыарда ахсын түөрт чааска тураллар.
Киинэни 2022 сылга көрүөхпүт. Оттон билиҥҥитэ долгуйа күүтэбит!
Хаартыскалар интэриниэттэн ылылыннылар