Быйыл Тыйаатыр уонна Сомоҕолоһуу сылынан сибээстээн, Дьокуускай куораттааҕы В.Г. Белинскэй аатынан бибилэтиэкэ ааҕар саалатыгар бэрт дириҥ ис хоһоонноох «Тыйаатыр. Аах уонна көр» диэн интэриэһинэй бырайыак үлэлиир.
edersaas.ru
Бырайыагы бибилэтиэкэрдэр Екатерина Попова, Елена Грайфер, Былатыан Ойуунускай аатынан Саха академическай драматическай тыйаатырын литературнай чааһын үлэһитэ, театровед Надежда Осипова уонна “Үһүс көлүөнэ» саастаах дьон кулууптарын иһинэн үлэлиир «Эрчим» доруобуйаны бөҕөргөтөр социальнай киин култуурунай сынньалаҥы тэрийээччитэ Татьяна Сергучева биир сүбэнэн кыттыһан сүрүннүүллэр. Тэрээһиҥҥэ бэйэлэрин идэлэрин таһынан тустаах интэриэстэринэн ураты эбии айар дьарыктаах тыйаатыр артыыстара, кириитиктэрэ, режиссердара кыттыыны ылаллар. Биллэн турар, бу бырайыак үлэтин саҕалаат да, дьон болҕомтотун бэйэтигэр тарпыта.
Бүгүн «Үһүс көлүөнэ» саастаах дьон кулууптарын иһинэн үлэлиир «Эрчим» доруобуйаны бөҕөргөтөр социальнай киин сынньанааччылара Былатыан Ойуунускай аатынан Саха академическай драматическай тыйаатырыттан РФ уонна СӨ үтүөлээх артыыһа Елена Сергееваны-Румянцеваны кытта көрүстүлэр.
«Дууһа хатыламмат эйгэтэ» диэн ааттаах истиҥ көрсүһүү артыыс олоҕун, айар үлэтин сырдатар быыстапкаттан саҕаланна.
Елена Сергеева-Румянцева Бүлүү улууһун Хампатыттан төрүттээх. 1985 сыллаахха М. С. Щепкин аатынан Москватааҕы Үрдүкү театральнай училищены бүтэрбитэ.
Тыйаатыр уонна киинэ актрисата айар үлэтин туһунан кэпсээнин ааҕааччылар бэркэ интэриэһиргээн иһиттилэр.
Елена Диасовна артыыс эрэ быһыытынан буолбакка, хаһаайка быһыытынан асчыт, быысапкаһыт, иистэнньэҥ быһыытынан эмиэ арылынна.
— Бэтэрээн артыыстарбытыттан үгүскэ үөрэммитим. Холобур, биир идэлээҕим Софья Барановаттан баайыыны уонна быысапканы баһылаабытым, — диэн кэпсиир актриса. Кини сиэнин бэйэтэ баайан таҥыннарар эбит. Оннук биир сарапааны аҕалан сөхтөрдө.
Ааҕааччылар бэрт үгүс интэриэһиргиир ыйытыыларын биэрдилэр.
Мэҥэ Хаҥалас Балыктааҕыттан сылдьар Любовь Гоголева «Чыҥыс хаан кистэлэҥэ» киинэҕэ Елена Румянцева хайдах уһуллубутун ыйытта. Онуоха актриса киинэҕэ уһуллар интэриэһинэй кэмин астына аҕынна уонна хаартыскаларын көрдөрдө.
— Оруолгутун ким быһаарарый? Артыыс бэйэтэ талыан сөп дуо, холобура: «Бу оруолга мин ордук арыллыам этэ», — диэн ыйытыыга актриса:
— Испэктээккэ дуу, киинэҕэ дуу оонньуур артыыһы эбэтэр актеру режиссер эрэ быһаарар. Онон биһиги оруол түбэһэрин кэтэһэр эрэ кыахтаахпыт, — диэн хоруйдаата.
Елена Диасовна чаҕылхайдык оонньообут «Ыаллыылар» телесериалын салгыы көстүө дуо диэн ыйыппыттарыгар актриса: «Барыта үбүлээһинтэн тутулуктаах. Мин ити сериалга саха аатырбыт артыыһын Мария Канаеваны кытта оонньообуппунан киэн туттабын«, — диэн эттэ.
Сунтаартан сылдьар Варвара Макарова гастролга артыыстар олох аҕыйахтык сылдьалларын бэлиэтээтэ. «Тиэтэйбити» Сунтаарга кэлэ сырыттахтарына көрбүтүн, онон артыыстар чаастатык улуустарга сылдьыахтарын наадатын ыйда.
— Ханнык баҕарар артыыска гастрол — саамай күүтүүлээх кэмэ. Ордук тыйаатырга саҥа хардыыны оҥорон эрэр артыыска бу улахан оскуола. Биһиги тыа сиригэр ыйы ыйынан гастроллуубут. Онон хоно сытан тыа сирин дьонун кытта алтыһабыт. Көрөөччү арааһынай. Хас биирдии улуус, нэһилиэк дьоно олох бэйэ-бэйэлэрин кытта майгыннаспаттар. Бастакы күн күлүөхтэрин баҕараллар. Иккис күн — ытамньыйахтарын. Ол иһин биир хабааннаах испэктээги хаһан да гастролга илдьибэппит. Хайаан да дьону күллэрэр уонна уйадытар өрүттэрдээх испэктээги талабыт. Тылбааһы олох ылымматтар. Тыа сирин көрөөччүтэ ордук классиканы уонна бүгүҥҥү кэми ылынар, — диэн санаатын үллэстэр Елена Сергеева-Румянцева.
Елена Сергеева-Румянцева гастролга сылдьан, бириэмэ булан быысапкалыырын сөбүлүүр эбит. Ол үлэлэрин аҕалан көрдөрөн, уран тарбахтаах мааныта буоларын итэҕэттэ.
Аны үҥкүүһүтүн туһунан элбэхтэ истибит дьон, артыыс аатырбыт «Ламбадатын» эмиэ тумнубатылар. Онуоха Елена Диасовна эдэркээн кэмин санаан ылла уонна дойду биир сурунаалыгар тахсыбыт хаартыскалаах ыстатыйатын көрдөрдө.
Тэрийээччилэр актриса Елена Сергеева-Румянцеваҕа бибилэтиэкэ бырайыагар кыттыбытыгар истиҥ махталларын тиэртилэр.
Онтон тэрээһин кыттыылаахтара аатырбыт артыыстарын кытта көрсүһүүнү өйдүү-саныы сылдьаары хаартыскаҕа түһэн үйэтиттилэр.
Тыйаатыр сылыгар анаммыт дириҥ ис хоһоонноох бырайыак салҕанар. Сотору кэминэн Саха тыйаатырын уочараттаах, эмиэ ааттаах-суоллаах, айымньылаах үлэлээх артыыһа кэлэн, көрөөччүлэрин кытта көрсүөҕэ.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.
