Сүрүн Үөрэх уонна наука

Артём Оганов: «Интеллектуальнай оонньууга кыттыһарбын тулуйбакка-тэһийбэккэ кэтэһэбин»

Арассыыйа саамай элбэхтик ахтыллар учуонайа, Билим уонна технология Сколковскайдааҕы институтун бэрэпиэссэрэ, дойду теоретик-кристаллограба, минеролог, химик, Арассыыйатааҕы билим академиятын бэрэпиэссэрэ Норуоттар икки ардыларынааҕы интеллектуальнай оонньууларга Дьокуускайга кэллэ.

edersaas.ru

Кинини сөмөлүөт пуордугар Үүнэр көлүөнэ пуондатын генеральнай дириэктэрэ, Норуоттар икки ардыларынааҕы интеллектуальнай оонньуулар быйылгы бырагыраамаҕа тэрийэр кэмитиэтин хос бэрэссэдээтэлэ Владимир Егоров көрүстэ. Бу күннэргэ оскуола үөрэнээччилэрин кытта дойду араас эрэгийиэнин уонна тас дойдулар инники күөҥҥэ сылдьар учуонайдара, педагогтара уонна эспиэртэрэ үлэлэһэллэрин бэлиэтиир.

Артем Ромаевич – уһулуччулаах учуонай, кристаллография, химия, минералогия салаатыгар бэйэтин үлэлэринэн аан дойдуга киэҥник биллэр. Кини манна «Yakutia International Science Fair» үөрэнээччилэр билимҥэ кэмпириэнсийэ-куонкурустарыгар эспиэр быһыытынан үлэлиэҕэ, лиэксийэ ааҕыаҕа уонна химическэй уопуттардаах маастар-кылаастары ыытыаҕа.

“Уһулуччулаах, бөдөҥ учуонайдары кытта сэһэргэһиини биһиги оҕолорбут, педагогтарбыт улаханнык сэҥээрэллэр. Ону тэҥэ, биһиги учуонайдарбытын кытта салгыы бииргэ үлэлэһэр кыаҕы ырытар соруктаах көрсүһүү былаанныыбыт. Бу билиҥҥи билими инники күөҥҥэ таһаара сылдьар дьону кытта илэ алтыһарга, билиилэрин сомсорго үчүгэй кыах”, — диэн  Владимир Егоров этэр.

Онтон Артем Оганов сүҥкэн, бэлиэ тэрээһинтэн улаханы эрэйэрин биллэрдэ: “Кэтэһэрбинээҕэр туох эрэ олус үчүгэйи көрүөм диэн эрэллээхпин. Тоҕо диэтэххэ, төһө даҕаны Саха сиригэр, интеллектуальнай оонньууга аан бастакыбын үктэммитим иһин, Саха сирин уонна оонньуулар туһунан миэхэ тиийэр иһитиннэриилэртэн сылыктаатахха, бу мин көрбүппүнээҕэр букатын дьикти, сөҕүмэр уратылаах. Онон оонньууларга кыттыһа охсорбун тулуйбакка-тэһийбэккэ кэтэһэбин”, — диэн Артем Оганов эттэ.

 

Норуоттар икки ардыларынааҕы интеллектуальнай оонньуу пресс-киинэ.

0
0
Telegram @edersaas20