Ньурба улууһуттан Саха сирин норуоттарын спортивнай оонньууларыгар 80 спортсмен 14 көрүҥҥэ илин-кэлин түсүһүөҕэ. Делегацияны Ньурба улууһун баһылыгын бастакы солбуйааччы Артур Янович Яковлев салайан илдьэ кэллэ:
— Спартакиадаҕа Ньурбаттан 80 спортсмен кыттар, онон ыалдьааччылардыын сүүстэн тахса киһилээх делегация буолан Бороҕоҥҥо кэллибит. Биһиги киэн туттар киһибит — бэйиэт, бэлитиичэскэй диэйэтэл Сергей Васильев-Борогонскай төрөөбүт дойдутугар Суотту нэһилиэгэр биһигини олус истиҥник көрсөн долгуттулар. Кини аатынан биһиэхэ пааркалаахпыт.
Ньурбалар спартакиадаҕа 14 көрүҥҥэ күрэхтэһиэхпит. Барыллаан киирсиилэр буола тураллар. Ол курдук, футболга уолаттарбыт мэҥэ хаҥаластартан 3:4 ахсааҥҥа хоттордудар. Баскетболга Хаҥалас улууһун кыайдыбыт. Күрэхтэһии тыҥааһына күннэтэ күүһүрэн иһэр. Буокса сайдыбыт улууһа буоламмыт, уолаттарбытыгар улахан эрэллээхпит.
Оонньууларга бэлэмнэнэр спортсменнарбытыгар оройуон өттүттэн тустаах көмө барыта көрүллүбүтэ. Кинилэр өрөспүүбүлүкэ иһигэр уонна таһыгар араас сбордары ааспыттара. Ким хайдах бэлэмнээҕин түһүлгэ көрдөрүөҕэ.
Аны биэс сылынан 27-с спортивнай оонньуулар биһиги улууспутугар буолар. Билигин суолбут-ииспит тупсан турар. Кэнники сылларга куораппытыгар үс успуорт саалата тутулунна. Итиэннэ чугас баар икки нэһиликкэ успуорт саалалара, Ньурбаҕа бэйэтигэр үс тыһыынча киһи олорор стадиона, бассейннаах улахан комплекс тутуллара былааннанар.
Айтана Аммосова.