Артур Пахомов: «Мэҥэ Хаҥалас боксердара бэлэмнээхтэр диэн бэлиэтиибин»
Аммаҕа буола турар Саха сирин норуоттарын спортивнай оонньууларын боксаҕа күрэхтэһиитэ олус тыҥааһыннаахтык бара турар. Ол курдук, бүгүн ыйааһыннарынан финалга тахсыы иһин киирсиилэр ыытылла тураллар.
Күрэхтэһии кэмигэр Арассыыйа спордун үтүөлээх тириэньэрин Артур Иннокентьевич Пахомовы көрсөн санаатын ыйыталастыбыт:
— Л.В. Киренскэй аатынан лицей спорка саалатыгар туруоруллубут рингэҕэ уон ыйааһыҥҥа иккилии боксер күрэхтэһэ сылдьар. Хас биирдии ыйааһыҥҥа улуустартан Саха сирин күүстээх боксердара кэлбиттэр. Инньэ гынан хас ыйааһын аайы иккилии-үстүү спорт маастара баар. Ол күрэхтэһиигэ тыҥааһыны эбэр, таһымы үрдэтэр.
— Киирсиилэр туһунан санааларыҥ?
— Билигин аҕай 52 киилэ ыйааһыҥҥа Сунтаар уола Валерий Егоров Горнай уолун Андрей Софронеевы кыайда. Валерий бу киирсиигэ үлэлээн туран кыайда. Оттон утарсааччыта Андрей ыгылыйан баран сылдьар курдук, саайыы кэлэн түһэрин хонтуруоллаабата. Кини атырдьах ыйыгар илиитин эмтэнэн баран аан дойду чөмпүйэнээтигэр хомуурга барыахтаах. Ол Челябинскайга буолуоҕа. Манна диэн эттэххэ, Горнай улууһа былыргыттан күүстээх боксердардааҕынан биллэр. Эдуард Даниловы бэлиэтээн туран ааттыыбын. Кини курдук кыахтаах уолаттар тахсан иһэллэрэ буоллар. Уопсайынан оҕо боксанан дьарыктаннаҕына бэрээдэктээх буолар. Аны туран оҕо үөрэҕэр ситиһиилээх буолуохтаах, тириэньэрин тылын истиэхтээх. Оннук эрэ оҕо улахан боксаҕа тахсар. Манна дьиэ кэргэнин эйгэтэ эмиэ улахан оруоллаах.
— Тириэньэр быһыытынан саамай бэлэмнээх хамаанданан ханнык улууһу ааттыан этэй?
— Күрэхтэһиигэ саамай бэлэмнээх хамаанда диэн Мэҥэ Хаҥалас боксердарын бэлиэтиэм этэ. Улуус баһылыга Николай Прокопьевич Старостин бокс да буоллун, тустуу да буоллун барытыгар кыһаллар, көмөлөһөр. Онон, манна кини улахан үлэтэ көстөр дии саныыбын. Оттон билиҥҥитэ финалга тахсар киирсиилэр буола турар буоланнар биир даҕаны спортсмены чорбоппуппун. Эппитим курдук, хас ыйааһын аайы маастардар бааллар. Сарсын туга, ханныга, дьэ, биллиэ буоллаҕа.
Айтана Аммосова.
Хаартыскаҕа: Арассыыйа спордун үтүөлээх тириэньэрэ Артур Иннокентьевич Пахомов уонна 1992 сыллаах Олимпиада кыттыылааҕа, боксер Анатолий Никитович Филиппов.