Бүгүн, алтынньы 14 күнүгэр, Арассыыйа уонна СӨ успуордун үтүөлээх тириэньэрэ Артур Иннокентьевич Пахомов күн сириттэн күрэннэ. Бу туһунан СӨ Успуорка уонна физическэй култуураҕа министиэристибэтин пресс-сулууспата бигэргэттэ.
Артур Иннокентьевич 1954 сыллаахха олунньу 15 күнүгэр Ньурба Антоновкатыгар төрөөбүтэ. Үрдүк категориялаах тириэньэр, Саха сиригэр уонна Арассыыйаҕа буокса успуорда сайдарыгар улахан кылааттаах. Спортсмен быһыытынан үрдүк ситиһиилэрдээх: өрөспүүбүлүкэтээҕи, Арассыыйатааҕы, Бүтүн сойуустааҕы чөмпүйэнээттэр кыайыылаахтара буолар.
Артур Иннокентьевич дьарыктаабыт боксердара аан дойду таһымнаах боксердар. Тириэньэрдээбитин устата успуорт икки успуорт үтүөлээх маастарын, хас даҕаны норуоттар икки ардыларынааҥы успуорт маастарын, ССРС уонна Арассыыйа успуордун 12 маастарын, элбэх хандьыдааты иитэн таһаарбыта. Биллэр үөрэнээччилэринэн Олимпиада боруонса призера, аан дойду чөмпүйэнээтин боруонса призера, Европа, Арассыыйа хас да төгүллээх чөмпүйүөнэ, Арассыыйа успуордун үтүөлээх маастара Георгий Балакшин, Риотааҕы Олимпиада кыттыылааҕа, аан дойду чөмпүйэнээтин үрүҥ көмүс призера, Европа, Арассыыйа хас да төгүллээх чөмпүйүөнэ Василий Егоров уо.д.а. буолаллар.
Улуу тириэньэр чугас дьонугар, доҕотторугар, иитиллээччилэригэр дириҥ кутурҕаммытын биллэрэбит.
edersaas.ru