Александр Артемьев: «Ийэ айылҕабыт кылгас сайыҥҥы күннэрин көдьүүстээхтик туһаныаҕыҥ!...
Олох-дьаһах

Александр Артемьев: «Ийэ айылҕабыт кылгас сайыҥҥы күннэрин көдьүүстээхтик туһаныаҕыҥ!»

Ытык-мааны сахам дьонугар Уруй Туску буолуохтун, Үрүҥ тунах ыһыах күнүнэн!

Сайыҥҥы күн муҥутуурдук уһаабыт кэмигэр, оппут-маспыт көҕөрөн, күүтүүлээх кэрэ кэммит тиийэн кэлбитинэн төрүт тэрээһиммит, өбүгэлэрбит үгэстэринэн Үөһээ Үрдүк Айыылар Мэҥэ халлаантан Сир Ийэҕэ үктэнэр, Ийэ айылҕа саҥалыы төрүүр-ууһуур, силигилии ситэр кэмигэр Үрүҥ ТУНАХ ЫҺЫАХ ыһыллар бэс ыйын 21 күнүнэн бука барыгытын итиитик истинник эҕэрдэлиибин!

Ыһыах сүрүн өйдөбүлэ саҥа олоҕу түстээһин, киһи аймах тыыннаах хааларын туһугар дьолго-соргуга, үтүөҕэ-сырдыкка дьулуура буолар. Ол иһин өбүгэлэрбит Ийэ айылҕаҕа, тыынар-тыыннаахха сүгүрүйэллэрэ. Кэҕэ этэн чоргуйда, күөрэгэй чыычаахпыт ыллаата, самаан сайыммыт салаллан тиийэн кэллэ. Бука бары үөрүөҕүҥ-көтүөҕүҥ!

Сайын – сахаҕа дьыл саамай суолталаах кэмэ. Бу кэмҥэ үлэбитин-хамнаспытын, олохпутун-дьаһахпытын хайдах тэринэрбититтэн сылы хайдах туоруурбут быһаччы тутулуктаах. Чуолаан бу кэмҥэ, саха киһитэ Айылҕаны кытары ордук чугасыһар, кини тыгыалыыр тымырын этинэн-хаанынан билэр, бүтэйдии ылынар.

Биһиги ураты айылгылаах дьон буоларбытынан айылҕалыын муҥутуурдук алтыһар, арчыланар, эмтэнэр, сомоҕолоһор кэммитигэр хас биирдии саха киһитэ ыһыах күнэ үүммүтүн этинэн-хаанынан билиэхтээх.

Быйыл дойдубутугар хара хамсык дьаҥа турбутунан, өбүгэлэрбит олохтообут Ыһыахтара куйаар ситиминэн ыытыллар. Бу үтүө кэмҥэ хас биирдиибит ис-иһиттэн сымнаан, көнньүөрэн ырааһырыах, чэбдигириэх, айылҕаны кытта ситиммитин бөҕөргөтүөх тустаахпыт. Ыһыах күн сахалыы таҥаһы сайбаччы кэтиэҕиҥ, сахалыы аhы-үөлү, иһити-хомуоhу дэлэччи тардаммыт Алгыс ылар маанылаах күммүтүгэр аал уоту оттон, сир-дойду иччилэригэр сүгүрүйэн салама ыйааммыт, Алааска, Эбэҕэ, Уот иччитигэр Хатан Тэмиэрийэҕэ арыылаах алаадьынан, уохтаах кымыһынан айах тутуоххайыҥ, сүгүрүйэн туран, уйгулаах-быйаҥнаах сайыны, туруктаах олоҕу, элбэх кэнчээри ыччаты, сүөһүнүаһы итиэннэ хара хамсык дьаҥа түргэнник ааһарын көрдөһүөҕүҥ.

Ийэ айылҕабыт кылгас сайыҥҥы күннэрин көдьүүстээхтик туһанан Үрүҥ Илгэни, алаастартан, сыһыылартан күөх быйаҥы сомсон ылыаҕыҥ. Тыа хаһаайыстыбатын бородууксуйатын оҥоруу тэтимин үрдэтэн, экологическай өттүнэн ыраас, дьон доруобуйатын бөҕөргөтөр, араас ыарыылартан харыстыыр олохтоох аһынан-үөлүнэн бар дьоммут сандалытын толоруоҕуҥ.

Биир дойдулаахтарбын, Үрүҥ тунах Ыһыах күнүнэн эҕэрдэлээн туран, бу күнтэн Үрдүк Үрүҥ Айыылар – Орто дойдуга чугаһаан, алгыһы, көрдөһүүнү ылынар кэмнэригэр Илгэ Айылҕабыт күөх уйгу быйаҥыттан күндүлээтин, Үрүҥ Илгэни үрүлүттүн, ыраас ыра санааларбыт туругурдуннар, бастыҥ баҕа санааларбыт туоллуннар, тыа киһитин олоҕо-дьаһаҕа тубустун диэн көрдөстөҕүм буоллун! Дом! Дом! Дом!

Истиҥ эҕэрдэни кытта Александр Артемьев, 

 Саха Өрөспүүбүлүкэтин “Саха сүөһүтэ” генофонднай хааһына тэрилтэтин салайааччыта,

Бүтүн Арассыыйатааҕы бааһынай хаһаайыстыбалар уонна кэпэрэтииптэр ассоциацияларын

(АККОР) Саха сиринээҕи салаатын бэрэсидьиэнэ.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

2 × пять =