Икки күннээх «Дыгын оонньууларын» сүүмэрдиир күрэхтэһиитэ түмүктэннэ. Уопсайа 12 бөҕөс сэттэ көрүҥҥэ илин-кэлин түһүстэ. Тыҥааһыннаах икки күннээх күрэхтэһии кэнниттэн, үс бөҕөс аны сайын Дыгын оонньууларыгар кыттар быраабы ыллылар.
edersaas.ru
Үс төгүл үскэ алтыс, тутум эргииргэ онус, мас тардыһыытыгар бастакы, сүүрүүгэ төрдүс, оҕунан ытыыга бэһис, таас көтөҕүүтүгэр иккис, хапсаҕайга уон биирис буолан, 37 очукуону сурунан, Владимир Федоров (Ньурба) үһүс миэстэ буолла.
Иккис миэстэҕэ Павел Друзьянов (Чурапчы) тигистэ. Кини үс төгүл үскэ төрдүс, тутум эргииргэ алтыс, мас тардыһыытыгар төрдүс, сүүрүүгэ ахсыс, оҕунан ытыыга иккис, таас көтөҕүүтүгэр төрдүс, хапсаҕайга бэһис миэстэ буолла.
Уонна муҥутуур кыайыылааҕынан, күүтүллүбүтүн курдук, Нам бөҕөһө Артем Варданян буолла. Кини 24 очукуолаах. Үс төгүл үскэ иккис, тутум эргииргэ үһүс, мас тардыһыытыгар иккис, сүүрүүгэ үһүс, оҕунан ытыыга ахсыс, таас көтөҕүүтүгэр үһүс, хапсаҕайга үһүс миэстэ буолла.
Виктория Бястинова, edersaas.ru, «Саха сирэ» хаһыат.
Хаартыска — yakutiamedia.ru