«Арт атриум» туһалаах тэрээһини дьон-сэргэ сэргээтэ

Ааптар: 
Бөлөххө киир:

Дьокуускайга А.Е.Кулаковскай аатынан норуоттар доҕордоһууларын дьиэтигэр «Арт атриум» тэрээһин дьону-сэргэни түмэ тардар, сэргэхситэр.

Сэргээбиттэр, сэҥээрбиттэр манна мустаннар босхо ырыа-тойук истэллэр, үҥкүү-битии көрөллөр, маастар-кылаастарга үөрэнэллэр, араас көрдөөх оонньууларга кытталлар, быыстапка-дьаарбаҥкаҕа сылдьаллар.

Дьону-сэргэни сэргэхситэргэ, болҕомтотун тардарга уонна туһалаах буоллун диэн тэрийбит тэрээһиннэрин Дьиэ кэргэн, таптал уонна эрэллээх буолуу күнүгэр үөрүүлээх быһыыга-майгыга тустаах тэрилтэ кэлэктиибэ саҕалаата. Бу үөрүүлээх күн мустубут дьону кытары Саха сирин норуодунай артыыстара Екатерина, Алексей Егоровтар, СӨ үөрэҕириитин туйгуна, Абый улууһун Бочуоттаах олохтооҕо, СӨ култууратын үтүөлээх үлэһитэ Владимир Индигирскэй, А.Е.Кулаковскай аатынан норуоттар доҕордоһууларын дьиэтин генеральнай дириэктэрэ, СӨ култууратын үтүөлээх үлэһитэ Антонида Корякина, музыкант, СӨ уонна Монголия култуураларын үтүөлээх үлэһитэ, Хатаска оҕо ускуустубатын оскуолатын флейта кылааһыгар преподавателэ Балдорж Хуухэ уонна СӨ үөрэҕириитин туйгуна Лариса Бурцева көрүстүлэр. Маны сэргэ, мустубут дьоҥҥо анаан бэртээхэй кэнсиэр буолла.

А.Е.Кулаковскай аатынан норуоттар доҕордоһууларын дьиэтин пресс-сулууспатыттан иһитиннэрбиттэринэн, манна тустаах тэрилтэ салаалара тэрээһин арааһын хас чэппиэр уонна бээтинсэ ахсын 17.00 чаастан 19.00 чааска диэри тэрийэн ыыталлар. Манна, бэлиэтэммитин курдук, быыстапка-дьаарбаҥкалар, аралдьытар көрдөөх оонньуулар, маастар-кылаастар тэриллэллэр, үҥкүү-битии көҕүлүттэн тутуллар. Онон Дьокуускай куорат олохтоохторо, ыалдьыттара сайын устатыгар уонна балаҕан ыйыгар сынньана, дьону-сэргэни кытары сэһэргэһэ таарыйа манна сылдьаргытыгар, көхтөөх кыттыыны ыларгытыгар ыҥыраллар.

Хаартыскалар А.Е.Кулаковскай аатынан норуоттар доҕордоһууларын дьиэтин пресс-сулууспатыттан

+1
0
+1
0
+1
0
+1
0
+1
0
+1
0
+1
0