Чурапчы улууһун киинигэр худуоһунньук Кыыдаана Игнатьева «LETO YAKUTIA» бэстибээл чэрчитинэн “Аттаах кыыс” муралы (дьиэ эркинигэр уруһуй) оҥордо.
Арт-эбийиэги Кыыдаана аҕыс күн иһигэр уруһуйдаата. “Саҥа хартыына харыстыыр, араҥаччылыыр аналлаах, төрөөбүт улууспар биир бэлиэ сиринэн буолуо диэн эрэнэбин. Муралы уруһуйдуур кэммэр оҕолор да, саастаах да дьон хайҕаан үөрдүлэр-көттүлэр. Ордук саастаах дьон биһирээбититтэн долгуйдум уонна астынным”, — диир эдэр худуоһунньук Кыыдаана Игнатьева.
Маны таһынан, кини оҕолорго анаан маастар-кылаас ыытта. 50-чэ оҕо мустан, аһаҕас айар дьарыкка сырыттылар. Онтон ураты сайдыылаах оҕолорго уонна кинилэр төрөппүттэригэр “Самоцветы” диэн мурал ис хоһоонун туһунан интэриэһинэй кэпсэтии таҕыста.
“Аттаах кыыс” мурал үөрүүлээх арыллыыта балаҕан ыйын 7 күнүгэр буолуоҕа. Манна олохтоохторго анаан шоу-бырагыраамалары, маастар-кылаастары, араас сынньалаҥы тэрийиэхтэрэ.
Санатан суруйдахха, «LETO YAKUTIA» бэстибээл Саха сиригэр Сомоҕолоһуу, Дьокуускайга Үтүө ыаллаах буолуу сылларын иитинэн ыытыллар. Бэстибээл чэрчитинэн хас биирдии куорат уонна сэлиэнньэ уратытын бэлиэтиир гына уулуссалары, дьиэлэри киэргэтиэхтэрэ.
Айтана Аммосова, «Саха сирэ» хаһыат, edersaas.ru