«Уһук Илин» В.К. Арсеньев аатынан Бүтүн Арассыыйатааҕы литературнай бириэмийэҕэ сайаапканы тутан бүттүлэр

«Уһук Илин» В.К. Арсеньев аатынан Бүтүн Арассыыйатааҕы литературнай бириэмийэҕэ кыттарга тэрийэр кэмитиэккэ 17 эрэгийиэнтэн 144 сайаапка киирдэ.

Бу киирбит 144 айымньыттан куонкуруска 94 үлэ ааспыт. Куонкуруска Уһук Илинтэн эрэ буолбакка, Арассыыйа кииниттэн эмиэ үлэлэр киирбиттэр диэн PrimaMedia иһитиннэрэр.

Ол курдук, Краснодарскай кыраайтан, Смоленскай, Волгоградскай, Саратовскай уонна Нижегородскай уобаластартан, Санкт-Петербургтан, Москваттан, Москва уобалаһыттан, Татарстантан, Саха сириттэн, Бурятияттан, Забайкальеттан, Амурскай, Сахалинскай, Магаданскай уобаластан, Хабаровскай уонна Приморскай кыраайтан суруйааччылар кыттыбыттар.

Коронавирус пандемията мэһэйдээн, куонкуруска сайаапканы тутуу болдьоҕун уһаппыттара. «Бастаан былырыыҥҥытааҕар аҕыйах үлэ киирбитэ. Онуоха кыттааччыларбыт бары былырыын кыттан кэбистэхтэрэ дуу диэн санаабыппыт. Маны кытта, коронавирус дьаҥа мэһэйдээтэ. Онон куонкурус болдьоҕун уһатан, виртуальнай «төгүрүк остуоллары» ыытан, Култуура министиэристибэлэрин кытта бииргэ үлэлээн, кыттааччы ахсаана элбии түстэ. 

Билигин эспиэдэр үлэни үс номинацияҕа араараллар — уһун, кылгас уонна оҕо прозата», — диэн бириэмийэ кураатара Вячеслав Коновалов санаатын үллэстэр.

Бу сыл балаҕан ыйын 20 күнүгэр бириэмийэ испииһэгэ, онтон сэтинньи 30 күнүгэр финалистар ааттара биллиэҕэ. Ахсынньыга лауреаттары билиэхпит, кинилэргэ Москваҕа Уһук Илин күннэрин кэмигэр 500-түү тыһыынча солкуобайы туттарыахтара.

edersaas.ru